JS NewsPlus - шаблон joomla Продвижение
الإثنين، 15 كانون1/ديسمبر 2014

حياة الطفل منذ ولادته والمراحل الأساسية لنموه و


" أنا " بحث ودراسة عن حياة الطفل منذ ولادته والمراحل الأساسية لنموه والصعوبات التى تؤثر فيه وفي بناء شخصيته

آيات أحمد منصور

أخصائية تعديل سلوك وصعوبات تعلم

                    ( مقدمة الكتاب )

بسم  الله والحمد لله

حياة الطفل منذ ولادته تواجهها مراحل أساسية لنموه وأيضًا صعوبات كثيرة تؤثر فيه وفي بناء شخصيته.

 كما أن تنشأة الطفل وتربيته وتعليمه قد تحتاج إلي ترتيبات شبه دقيقه ليست مادية فقط إنما معنوية وإجتماعية ليست بالباهظة التي تتطلب بذل مجهود خارج عن طاقة الإنسان العادي .

إنما هي فقط تحتاج إلي التوعية والدراسة المسبقة لمن هم مكلفون بالعناية بالأطفال

الأطفال يواجهون العديد من آليات الظلم والقسوة منذ الولادة، وتتجلي تلك الآليات المدمرة لشخصيته ما بين أسرة في جهل تربوي، ومجتمع يعمّه الجهل لم يتم توعيته بأهمية الطفل وقدراته التي هي أمل ومستقبل الشعوب .

هل تعلم أن مستقبل المجتمعات وتقدمها يتوقف علي طريقة نشأة ذلك الطفل وتعليمه . 

سينظر إليّ الكثير بأعين متسائلة هل فعلًا الطفل أمل الشعوب؟؟؟

سأجيب قائلة بكل تأكيد!!!

فالرجل والمرأة هم عنوان سياسات وحضارات الأمة التي نشأوا فيها وأخلاق شعوبها التي تسودها .

لنجري معًا دراسة وهمية علي أحد أفراد مجمتعٍ ما،

 بشرط أن يكون الشخص محور الدراسة قد تطورت نشأته بالكامل في متوسط أعراف وسلوكيات دولته المتعارف عليها لم تؤثر  فيها مكتسبات من بلدان أخري

أي  "إبن بلده صِرف" .

أثبت لكم بقينٍ جازم أننا من خلال دراستنا لشخصيته وتحليلها

سوف نعلم كل شئ عن مستوي عائلته وسياسة بلده وحتي حالتها الإجتماعية والإقتصادية التي تمر بها .

لماذا؟؟؟

لأنه كان في البداية طفل.

الطفل سياسة،  علم، مشاعر

 

وبالبحث ستجد أكثر الناس رقة في القلوب ورفقًا ولطفًا وإحساسًا بمشاعر الأخرين هؤلاء الذين يقومون علي تنمية وتنشأته الطفل بإخلاص.

وأهم ما يحتاجه الطفل ليكمل مسيرة حياته ومستقبله هي.....

احترامه لذاته وثقته بنفسه ويقينه بأنه لم يخلق عبثًا، لم يخلق ليحمل الأعباء والواجبات منذ ولادته وحتي مماته إنما يمر بمرحلة مرح هي مرحلة الطفولة .

 

فهؤلاء الذين يظنون أن حكمة الخلق فقط  " الكد. الكدح. العطاء دون الأخذ "

ينفذ رصيد إخلاصهم ويقينهم بالله سريعًا في المواجهات والمشاكل وأول كلمة تتبادر لأذهانهم ولألسنتهم " ليه كدة يارب أنا معملتش حاجة وحشة " .

بل فعلت أنت... سقت  نفسك للهاوية.

 فقد نسيت وتناسيت حق نفسك عليك

 تكدح ، تتعب ، تجتهد تلك وسيلة وليست هدف .

خلقنا  الله لنحقق السعادة بالعبادة.

 ولتتذكر أن العبادة لا تجلب الشقاء أبدًا.

ومن هذا المنطلق عزمت عمل حلقات

                 " أنا "

 والتي سنتعلم من خلالها سويًا بعض الطرق لمساعدة أطفالنا علي إحترام ذاتهم والثقة بها .

الثقة التي لا تصل لحد الغرور والكبر.

وقد عملت علي ربط كل فصل من فصول الكتاب بموقف من سير الأنبياء أو الصحابة لأسباب أوجزها في الآتي :

 

1 . يبتعد الخلق في بعض الأحيان عن تنمية وإكتشاف قدراتهم ومهاراتهم ومهارات أولادهم التي وهبهم الله إياها بحجة الزهد في الدنيا .

2. خوف الناس من الوقوع في الفتن إذا تبحَّروا في أبواب العلم والمعرفة .

3 .إلقاء الضوء علي سبيل الرسل والأنبياء الذين نالوا نصيبهم من علوم الدين والدنيا والذي ساعدهم في بلوغ الدرجات العلا من الجنة.

مثال  علي ذلك قول النبي صلي الله عليه وسلم " حبب إلي من دنياكم الطيب والنساء"

لم يمنع الرسول نفسه من النساء أو يستحي من البوح  بحبه لهم ولكنه طلبهم بالعبادة " الزواج"

كان محبًا للعطر ولم يحرمها علي نفسه زهدًا وورعًا ولم يقل أتبرع بثمنها بل طلبها لنفسه بالعبادة " بالطرق الحلال  .

4 .الثقة بالنفس دائمًا موضع إتهام  من الأفراد والمجتمعات علي حد سواء

مسلمين كانوا أوغير مسلمين فهي موضع النظر العفيف والترفع عنها خير بديل،

هي عندهم بمثابة الخُلق البذئ كالنرجسية و الغرور  وحب الذات.

ولقد هيأ الله رسله وعلمهم ،

 وعلم بقدراتهم التي أنبتهم بها وهم بدورهم ءامنوا ووثقوا بما وهبهم الله به ، فغيروا الأمم كاملة .

 5 . كذلك للثقة بالنفس متعة ولذة في قلوب البشر فهي دائمًا في إزدياد ٍ وتطور والوازع الديني له الدور الأكبر في تقويمها وتقليم أظافر بلوغها حد النرجسية والغرور.

تؤثر في شخصية الطفل وثقته بنفسه مؤمنًا بذاته ثلاثة مستويات هي :

 

1 .الفرد.

تتأثر شخصية الطفل نفسه ببعض المكتسبات الوراثية والتي يولد بها كبعض الإضطرابات أو المتلازمات أو الأمراض التي تؤثر في احترامه لذاته وثقته بنفسه .

وكذا قد يولد الطفل طبيعيّ فيؤثر فيه عامل خارجي بكلمة سمعها من شخص أو سلوك قام بتقليده أو... أو نظرة غيرت مجري حياته.

 

2 .الأسرة

 لها الحظ الأكبر  في عملية بناء أو هدم ثقة الطفل بنفسه وكذلك لها الأثر البالغ في دعم إحترامه لذاته وإعتزازه بإنسانيته .

ويتجلي ذلك في الصفات المكتسبة أو الوراثية .

3 .المجتمع

 وهو البيت الأكبر الملئ بجنود النقد والهزيمة النفسية.

يتجلي دور المجتمع في توعية أفراده وإرساء وتقنين بعض النصوص التي تعزز احترام الذات.

وفيما يلي سيتطرق الكتاب بفصوله الخمسة عشر لبعض المشاكل التي تواجه إحترام الذات وأسباب التي تثير تلك المشاكللي ايجاد بعض، كما سنتناول سويًا بعض الحلول التي تعزز ثقة الطفل في نفسه وتعيد إليه إحترامه لذاته.

وسوف أعرض الحلقات باللهجة العامية المبسطة التي تصل لقلب وعقل القارئ وتترك الأثر المطلوب في نفسه بإذن الله.

ملحوظة. المستهدف من الحلقات

—الأطفال

—الآباء

— القائمين علي تنشئة وتربية وتعليم الأطفال .

— المجتمع بأسره.

تابعوا معنا .

آيات أحمد منصور

أخصائية تعديل سلوك وصعوبات تعلم

 

أنا

الحلقة الأولي

" أنا "
حقي أخد حب وحنان أمي
 " أنا "
انا لازم أكون نفسي ومش مغرور
 " أنا "
لازم أكون راضي عن نفسي
 " أنا "
عبادتي سر وجودي وثقتي في نفسي من ثقتي في دين ربي
السلام عليكم ورحمة الله وبركاته

 " أنا "

حلقات جديدة بنقدمها
لكل أب
وكل أم
وكل مربي
وكل فرد في المجتمع
بنتعلم فيها إزاي نزود ثقة ولادنا في نفسيهم

الحلقات دي مش لأولادنا بس...
لأ دي لينا إحنا كمان
الطفل نعمة وأمانة
وإنك تكون مسئول عن تنشئة طفل مسئولية مش أي حد يقدر يتحملها
والشعور بالنجاح والتشجيع وقود يساعدك في طريق تحقيق الهدف

هبدأ بمثال هَيوضح هدفي من الحلقات اللي جاية دي كوووولها  بس ......
 للي يفهمها

لما نزل الوحي علي النبي محمد صلي الله عليه وسلم وهو في الغار رجع الرسول للسيدة خديجة وكان جسمه كله بيرتجف من عظمة الموقف وقالها وقتها
" لقد خشيت علي نفسي"
فردت عليه قائلة

1. "كَلاَّ وَاللَّهِ مَا يُخْزِيكَ اللَّهُ أَبَدًا
2 . إِنَّكَ لَتَصِلُ الرَّحِمَ.
3 .وَتَحْمِلُ الْكَلَّ.
4. وَتَكْسِبُ الْمَعْدُومَ
5 .وَتَقْرِي الضَّيْف
َ6 .وَتُعِينُ عَلَى نَوَائِبِ الْحَقِّ".
ياااااااه
تخيلوا كمية الثقة والامان اللي اكتسبها الرسول في اللحظة دي
فكان محمدًا صلي الله عليه وسلم




 "إحترام الذات طريقك وطريق طفلك إلي النجاح "

دة عنوان حلقتنا النهاردة واللي هنتكلم فيها إن شاء الله
عن أهم حاجة في حياتنا وحياة أطفالنا
وهي الثقة بالنفس واحترام الذات
وفي البداية عايزين نعرف إيه هي الثقة بالنفس ويعني إيه إحترام الذات

تصدقوا إن الثقة بالنفس ليها معني مختلف تمامًا عن إحترام الذات
لإن احترام الذات هو
شعورك وشعور طفلك تجاه نفسكم . ياتري بتحبوا نفسكم فعلا ولا بتتمنوا إنه ماكان حد فيكم إتولد ؟؟؟؟
وعلشان تقدر تحترم ذاتك إنت وطفلك لازم تعرف قيمتك في الدنيا الأول وتعلم طفلك كدة .
تعلمه إن ليه قيمة في الحياة .
بس طبعًا لو قدرت إنك توصل طفلك لإحترام ذاته لازم نوجه الشعور ده إنه يبقي بشكل إيجابي مش يوصل أبدًا للغرور.
أما الثقة بالنفس فهي.
كيف يشعر طفلك تجاه قدراته ومهاراته الشعور دة هيوصله منك إنت الأول .
إنت عينه ........ شايفه إيه؟
ياتري إيه اللي يقدر يحققه وينجح فيه وإنت بتنميه؟؟

ومن هنا نعرف إن الثقة بالنفس هي نتيجة لإحترام الذات
لإن طفلك لو إحترم ذاته وشعر تجاه نفسه بالرضي هيبدأ ينتبه لقدراته بنفسه ويطلب مساعدتك.
طفلك لو علمته من صغره إنه قوي مش بيخاف وإنه ناجح؛
هيحترم ذاته وتظهر قدراته اللي تساعده علي تحقيق ذاته وهيقدر بالفعل يكمل طريقه وهيكون ليه هدف هيقدر يحققه إن شاء الله.
أما لو كان كل تركيز المسئولين عن تنشئته سلبي .
إنت فاشل إنت جبان إنت مش هتقدر تكون إنسان .
أكيد مش هيحترم ذاته ولا يثق في قدرته اللي المفروض تساعده علي تحقيق أي طموح وأحلام .
وبعدها يكون شاب فارغ هوائي غير منتج أبدًا لإنه شايف قدرات الآخرين فقط
مش قادر يشوف قدرات نفسه

من هنا بكلم كل أب وكل أم وكل شخص مسئول عن التربية وبقوله ساعد الطفل علي احترام ذاته.
لإنك بكدة انت خليته قادر يفهم نقاط قوته  ويهتم بيها وتبقي مصدر ثقته في نفسه.
إنت ساعدته يبص لنقاط ضعفه نظرة إيجابية ويحولها لمراكز قوة  وده بيخليه يقدر يقاوم المشاكل والصدمات اللي بتقابله وهتقابله في حياته بعد كده وبتخليه دايما متفائل ومبتسم

وده طبعًا علي عكس الطفل اللي عنده مشاكل في احترام الذات .
تلاقيه دايما محبط وعنده صعوبة وإضطرابات في حاجات كتير حتي اللعب والدراسة الأكاديمي كمان .

المشكلة الأكبر لما الموضوع يطور ويوصل لفقدان أهم حاجة في حياته وهي
فقدان التعبير عن مشاعره ورغباته... كارثة!!!

طيب إيه الحل إزاي اساعد ابني ؟؟؟؟وكمان أساعد نفسي ؛
لأن المشكلة دية مش بتقابل الاطفال بس لأ دي بتقابلنا إحنا الكبار كمان.
وفيه منا اللي مترباش صح مش بيقدر يواجه المشاكل والصدمات بالرغم من إننا كبار وبالغين .
حاضر هجاوب عليكم إن شاء الله بس... للي هيطبقه.

السر بقي بإختصار شديد

– الثناء عليه وتشجيعه زي ما ورد في الحديث الشريف وإظهار نقاط قوته وننميها وبعدها نقاط ضعفه هتتعالج وحدها.
لكن الثناء والمدح مش بس لمَّا يعمل حاجة كويسة لأ
لكن بردة الثناء والمدح بيبقي حتي في وقت ضعفه وفشله في انجاز بعض الأعمال.
زي لو مقدرش يجيب درجات عالية
او منجحش في الامتحان أصلًا أو لو حاول ينضم لفريق كرة القدم مثلا
و فشل في اختبار القبول اوعي تقوله في اللحظة دية "ان شاء الله تعوضها المرة اللي جاية " لاااااااأ.

لإنك في اللحظة دية إنت بتضرب علي الوتر الحساس عنده وإنت مش حاسس لانه بيعاتب نفسه وإنت مش حاسس لانه فشل .
هو محتاج حد يقوله انت مفشلتش أنت نجحت .
  وهنا بقي دور الأم أو الأب أو المربي
في إنه يقوله "أنا فخور جدا بيك لإنك بذلت مجهود رائع"
إنت أحسن ابن أو بنت في الدنيا دي كووولها "
– بطَّل تبص لإبنك نظرة سلبية تحسسه وتحسسك إنه أقل من غيره أو حتي تفكر في كده.
– ركز عليه وشوف صفة واحدة كويسة فيه وتابعها وخليها مصدر قوة.
– أكتب إنت وهو خمس حاجات عملتوها صح ودة كل يوم.

تمام ...إنتهت حلقتنا النهاردة
بس ... " أنا " 

لسة ما إنتهتش
مستنسية رد فعلكم ورد فعل ولادكم علي الحلقة
يالا نعملها إستراتيجية ونطبقها سوا 

ولا تنسونا ووالدينا ومن علمنا من صالح دعائكم .

أشوفكم الحلقة اللي جاية إن شاء الله
مع تحيات آيات أحمد منصور
والسلام عليكم ورحمة الله وبركاته

أنا
الحلقة الثانية

" أنا "
حقي اخد حب وحنان امي
 " أنا "
لازم اكون نفسي ومش مغرور
 " أنا "
لازم اكون راضي عن نفسي
 " أنا "
عبادتي سر وجودي وثقتي في نفسي من ثقتي في دين ربي

السلام عليكم ورحمة الله وبركاته
 " أنا "

حلقات جديدة بنقدمها لكل أب وكل أم وكل مربي وكل فرد في المجتمع
بنتعلم فيها إزاي نزود ثقة ولادنا في نفسيهم .
الحلقات دي مش لأولادنا بس
لأ دي لينا إحنا كمان
الخوف صفة بنتولد بيها هي مرشد لينا أحيانًا بس المهم نساعد ولادنا إنها متتحولش لمرض مزمن يحتاج لعلاج
 
هبدأ بمثال هَيوضح مضمون الحلقة كوووولها وعلاجها كمان
  بس ......
 للي يفهمها

سيدنا موسي عليه السلام في أكتر من موقف كان خايف من العصا اللي بتتحول لثعبان

خوفه ده مش معناه ضعف لأ.
دة خوف فطري لازم يكون موجود عند الإنسان .
ولأنه كليم الله ربنا علمه الثقة واليقين
 فقال له " لا تخف إني لا يخاف لدي المرسلين " .
 وقال " أقبل ولا تخف إنك من الآمنين "
 وقال " خذها ولا تخف سنعيدها سيرتها الأولي " .
 ودة كان تمرين جميل جدا ربنا عزوجل علمه لسيدنا موسي للثقة بالله وكسر جدار الخوف !!!
والنتيجة كانت الثقة واليقين التام من سيدنا موسي
وده ظهر لما قوم موسي كانوا في حالة يأس وهروب من فرعون وظلمه هو وقومه ولما فرعون فضل يلاحقهم لحد البحر
لقوا نفسهم البحر قدامهم وفرعون وراهم ولو لحقهم مش هيرحمهم أكيد .
في اللحظة دي صرخ قوم موسي وقالوا
" إنا لمغرقون "
لكن سيدنا موسي رد عليهم بقوة ويقين بالله وقال " كلا إن معي ربي سيهدين " 
ياااااااه كل دي ثقة حتي قدام البحر .

ياااااه حتي قدام البحر !!
دة لأنه إتربي كويس ربنا اللي رباه.
وبكده وصل سيدنا موسي للسعادة بعد الخوف.
وقدر إنه يقاوم مشاكل وصدمات الحياة بعد كدة .
تربية ربانية بقي

  " أنا خايف "

دة عنوان حلقتنا النهاردة واللي هنتكلم فيها إن شاء الله عن الخوف وعدم الشعور بالأمان .
عدم شعور الطفل بالأمان مشكلة كبيرة بتواجه
" الأنا الخاصة بالطفل واللي بتأثر علي الثقة بالنفس وإحترام الذات "عند الأطفال والكبار للأسف كمان.
بس خلينا في الأطفال دلوقتي

" أنا خايف "

حقيقي الكلمة دية بنسمعها كتير من ولادنا بس خدوا بالكم الخوف دة شئ طبيعي جوانا إحنا كبشر مش لازم دايمًا نعتبره مرض مزمن ومحتاج لعلاج.
ودة كلام الدكتور 
chansky مؤلف كتاب تحرير طفلك
هو شايف أن الخوف أحيانا بيبقي زي أمان للطفل من إنه يتهور ويعمل حاجات كارثية ممكن تضره وتأذيه بشكل مبالغ فيه .
زي إنه يمسك النار أو يقع من مكان عالي  مش بس كدة لأ
دة الدكتور أضاف إن الخوف بيكون تطور طبيعي في جسم الإنسان.
زي الطفل اللي يخاف من الثعبان
مثلًا بالرغم من إنه مش بيشوفه كتير أو ممكن مشافهوش ..خالص .
ومن كدة قدرنا نعرف إن كل مرحلة وليها سماتها والمخاوف المرتبطة بيها.
وغالبا النوع دة من المخاوف بنقدر نسيطر عليه لما بنوجهه التوجيه الصحيح .
لكننا بنعتبر الخوف أحيانًا مرض ومحتاج تدخل علاجي في بعض الحالات.
زي إن الخوف تبقي ليه نتايج وتبعات غير مرغوب فيها
لو إتسبب له في إكتئاب مثلًا أونقص الإنتباه أو الوسوسة وفوبيا الخوف وللأسف دة بيتطور بعد كدة لفقد الثقة بالنفس وعدم تقدير الذات.
ولازم نعرف إن البيئة المحيطة بالطفل بيبقي ليها دور وعامل سلبي مهم في تطور الخوف عند الطفل بالطريقة دي.
ومن الأساليب دي إساءة معاملة الطفل مثلا.
وعدم الرقابة علي الكرتون والأفلام، وكمان مشاكل الأسرة اللي مبتخلصش وحرصها وخوفها الزايد علي الطفل .
والعلاج أكيد مش إننا نمنع تواجده وإحتكاكه بالمثير أو الحاجة اللي بتسبب الخوف .
لاننا بكدة مش بنساعده في إنه يواجه صعوبات وضغوطات الحياة وصدماتها اللي هتقبله في حياته بعد كده لأ دة لازم علاج ليها .
طيب العلاج إيه؟؟؟؟
هقولكم علي السر إن شاء الله بس ..... للي هيطبقه .

السر بقي باختصار شديد بيتقسم لعدة نقاط وهي

1. أهم حاجة في العلاج إنك تقدر تساعد الطفل إنه يعبر عن مشاعر الخوف اللي جواه وطبعا دة بداية العلاج.
بتعزيز الثقة بالنفس وإحترام الذات وإنك تساعده إن تخلي خوفه يبقي مصدر قوة.
وإنك تحسسه إن قوته دي تقدر تبقي أكبر حتي من الخوف اللي موجود عنده .
2 . دايمًا نحسسه بالأمان زي ما حصل مع سيدنا موسي في قصته
والأم تقدر تحتوي طفلها في اللحظة دي بمساعدة مباشرة أو غير مباشرة من الاب طبعا.
بإنهم يمدوا الطفل بالتغذية العاطفية واللي هي بمثابة الاحتياجات اللازمة لبقاءه علي قيد الحياة.
3 .كمان العلاج السلوكي ودة بإن إحنا نعرضه للموقف أو الحاجة اللي بيخاف منها بس دة بيبقي بالتدريج  وتحت اشراف معالج سلوكي طبعا.
4 . توعية البيئة المحيطة بيه بإبعاد الطفل عن الحاجات اللي ممكن تطور الخوف عنده إنه يبقي خوف مرضي
زي أفلام الرعب وتعمد تخويفه للمرح والضحك أو السخرية مثلًا .
خدوا بالكم العلاج لازم يكون مشترك بين جميع أفراد الأسرة مينفعش فرد لوحده.

وكمان مننساش طريقة  النمذجة.
تمام إنتهت الحلقة النهاردة بس...
 " أنا "
لسة ما إنتهتش
مستنية رد فعلكم ورد فعل ولادكم وإعتبروها إستراتيجية ويالا نطبقها سوا

اشوفكم الحلقة اللي جاية إن شاء الله
ولا تنسونا ووالدينا ومن علمنا من صالح دعائكم
والسلام عليكم ورحمة الله وبركاته
مع تحيات آيات أحمد منصور

 

. أنا

الحلقة الثالثة

" انا "

طفل وحقي اخد حب وحنان

" انا "

طفل وحقي في قدراتي الاقي

صدق وإيمان

" انا "

سري في كلمة هيا إلي الأمام

" انا "

طفل لكن في النهاية
...إنسان

السلام عليكم ورحمة الله وبركاته

❣❣❣" انا "❣❣❣

حلقات جديدة بنقدمها
لكل أب
وكل أم
وكل مربي
وكل فرد في المجتمع
بنتعلم فيها ازاي نزود ثقة ولادنا في نفسيهم .

المستفيدين من الحلقات دي مش بس الأطفال اللي ليهم أب وأم بس
لأ دة فيه أطفال كتير بيفقدوا أمهم وأبوهم .
لكنهم ليهم حق علي المجتمع إنهم يستفيدوا معانا من الحلقات.
وإحنا كمان معاهم بنستفيد.
وهبدأ بمثال حيوضح المقصود بكلامي والحلقة كووولها بس ......اللي يفهمها

بعد وفاة عبد المطلب جد النبي صلي الله عليه وسلم قام أبو طالب برعاية ودعم سيدنا محمد صلي الله عليه وسلم  مدة 40 سنة.
ولما كفار قريش ساوموه علي الرسول صلي الله عليه وسلم مساومة غريبة أوي رفض بشدة
لكن كفار قريش هددوه إما محمد أوالحرب.
رجع بسرعة أبو طالب للرسول يطلب منه يتراجع لأنه خايف عليه منهم
 فأجابه رسول الله
والله لو وضعوا الشمس في يميني والقمر في يساري ما تركت هذا  الأمر حتى يظهره الله أو أهلك في طلبه .
ياسلاااااام رائع ثقة وثبات عنده هدف وبيدافع عنه.
وكان رد أبو طالب كمان رائع
جدًا والله
– لن يصلـوا إليك بجمعهم
– حتى أوسد في التراب دفينـا
– فاصدع بأمرك ما عليك غضاضة
– وأبشر وقُر بذاك منك عيونـا
– ودعوتني وعرفتُ أنك نـاصحي
– ولقد صدقت وكنت ثم أمينـا
– وعرضت ديـنا قد عرفت بـأنه
– من خير أديان البرية دينـا
– لولا الملامـة أو حذار مسبـة
– لوجدتـني سمحا بذاك مبينـا

شوفتوا بقي مش قولتلكم رده كان رائع.

 ولما الرسول لقي اللي يدعمه ويشجعه ويديله رسائل وتوقعات إيجابية  كان محمدًا خير خلق الله بالرغم من إنه كان يتيم .

انقذني وصدقني وآمن بقدراتي وتفكيري
دة عنوان حلقتنا النهاردة.
ومن كتاب العقليات الرياضية
لمعلمة الرياضيات
Jo boaler.
هناخد منه مقتطفات صغيرة  واللي بتقول فيها
أطلق العنان لقدرات الطفل للمرور بالإبداع الرياضي من خلال الرسائل الملهمة والتعليم المبتكر
وبتحكي
boaler عن طفلتها اللي عندها خمس سنين واللي قدرت انها تغير مستقبلها بنفسها .
لما رجعت من المدرسة مضايقة ومحبطة وبتشتكي لمامتها من معلمة الفصل وبتقول لها " إن المعلمة بتتعمد تدي الطلاب المسائل الصعبة ومفكرتش في قدرات الطفل ولا إمكانياته "
ولإن إمكانيات الدولة وقتها كانت محدودة كانت طريقة التعليم ثابتة  بشكل رهيب ودة كان هيدمر عندها الثقة بالنفس وحب التعلم .
ولكن بمرور السنين إجتهدت الأم وبمساعدة بعض المعلمين الرائعين قدرت الطفلة انها تجتاز المرحلة الصعبة دي.
وطبعا دة لإنها قدرت توصل معاناتها بصوت عالي .
شوفوا معايا كام طفل مش قادر يوصل صوته؟؟؟؟
مش بس نتيجة عدم إيمان المعلمه بيه ودة طبعا شئ خطير.
لأ دة كمان البيت والناس المحيطين بيه بيفضلوا يمارسوا عليه تمارين الهزيمة النفسية والتدمير الذاتي لحد ما الطفل بيصدق إن وجوده للعالم عبء وغلطة وزيادة علي المجتمع وبالتالي بيكره نفسه والمجتمع اللي مش قادر يحتويه للاسف .


إنت مش بتفهم إنت غبي إنت عندي إنت اناني إنت طالع أسود ووحش لمين إنت انفك كبير  شكلك مش جميل إنت مش نضيفة إنت .. إنت...الله المستعان.
وتخيلوا لما الأم يبقي إبنها حدوتة العصر وهي أحد الرواة في كل جلسة.
‍ويبقي هو موضع النقد والسخرية علي طول.
وبدال ما الأم أو الأب أو المربي يبقي الركن الشديد بالنسبة للطفل لأنه ضعيف ومش قادر يدافع عن نفسه لأ دول بيشاركوا ويحطوا رسائل وتوقعات سلبية غرييييبة ودة بيدخله في عالم تاني خالص
الله المستعان.
 ومن هنا بقول لكل أب وكل أم وكل مربي أو معالج اللي مش قادر يربي طفل صح مش لازم يجوز ويجيبه ويأذيه.

 وبرده بقول برده لكل معلم لو مش قادر تعلم صح ،
شوف لك باب رزق تاني الله يكرمك .
طيب إحنا غلطنا ومعترفين بتقصيرنا لكن الحل إيه ؟؟والسر إيه؟؟؟؟....
هقولكم علي السر إن شاء الله
بس ....للي هيطبه.
السر بقي باختصار شديد
1 . " أنا أقدم لك الملاحظات لأنني أؤمن بك وبقدراتك "
 جملة بسيطة خالص لكنها كانت قوية ونتيجة دراسة حديثة قام بها كوهين وغارسيا عام 2014  أثبتت مدي قوة وفاعلية تصديق وإيمان المعلم بالأطفال أكيد الأثر بيكون واضح جدا في تحصيلهم الدراسي .
2 . مش بس الرسايل الملهمة هي المهمة دة كمان التوقعات الإيجابية لمستقبل الطفل واللي بتفضل في ذهنه لحد ما يموت.
3 . لازم كل أب وكل أم يتعرف علي شخصية ونوع ذكاء طفله ويشتغل عليه .
4 . علم الطفل دايما بإبتسامة ثقة إن الفشل أول خطوة في طريق النجاح .
5 .ساعده يعمل إنجازات ولو بسيطة وسجلوها سوا .
 وبكدة نكون حطينا رجلينا علي أول الطريق لبناء إنسان .
تمام إنتهت الحلقة النهاردة بس...
❣❣❣ انا ❣❣❣
لسة ما إنتهتش مستنية رد فعلكم ورد فعل ولادكم ، واعتبروها إستراتيجية ويالا نطبقها سوا .
 أشوفكوا الحلقة اللي جاية إن شاء الله.
ولا تنسونا ووالدينا ومن علمنا من صالح دعائكم
مع تحيات آيات أحمد منصور
والسلام عليكم ورحمة الله وبركاته

 

أنا

الحلقة الرابعة

أنا

بثقتي وتفكيري
اتسلقت الجبال اميال

 أنا

بثقتي وتفكيري
لمست السحاب وغصت في أعماق البحار

 أنا

بثقتي وتفكيري
زرت زحل وكمان خدت لفةالمجرات

 أنا
عبادتي سر وجودي وثقتي في نفسي من ثقتي في دين ربي
السلام عليكم ورحمة الله وبركاته

 أنا
حلقات جديدة بنقدمها
لكل أب
وكل أم
وكل مربي
وكل فرد في المجتمع
بنتعلم فيه مع بعض إزاي نزود ثقة ولادنا في نفسيهم
الحلقات دي مش لأولادنا بس لأ دي لينا إحنا كمان
كنا ابتدينا المرة اللي فاتت نقف علي أول الطريق بإن إحنا ندعم أطفالنا ونصدقهم وكمان نعلمهم إزاي يفهموا نفسهم
ودة بإن إحنا نبحث في ميولهم وقدراتهم ونرفعها ودة أكيد هيساعدهم علي إحترام الذات والثقة بالنفس.
 النهاردة ان شاء الله هنفَصَّل شوية في الكلام ده لكن.

التفصيل دة هياخد مننا أكتر من حلقة
هبدأ بمثال هيوضح معني الكلام دة كله بس.... للي يفهمها

قال تعالي
وَكَذَٰلِكَ نُرِي إِبْرَاهِيمَ مَلَكُوتَ السَّمَاوَاتِ وَالْأَرْضِ وَلِيَكُونَ مِنَ الْمُوقِنِينَ (75) فَلَمَّا جَنَّ عَلَيْهِ اللَّيْلُ رَأَىٰ كَوْكَبًا ۖ قَالَ هَٰذَا رَبِّي ۖ فَلَمَّا أَفَلَ قَالَ لَا أُحِبُّ الْآفِلِينَ(76) فَلَمَّا رَأَى الْقَمَرَ بَازِغًا قَالَ هَٰذَا رَبِّي ۖ فَلَمَّا أَفَلَ قَالَ لَئِن لَّمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ (77) فَلَمَّا رَأَى الشَّمْسَ بَازِغَةً قَالَ هَٰذَا رَبِّي هَٰذَا أَكْبَرُ ۖ فَلَمَّا أَفَلَتْ قَالَ يَا قَوْمِ إِنِّي بَرِيءٌ مِّمَّا تُشْرِكُونَ(78) إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالْأَرْضَ حَنِيفًا ۖ وَمَا أَنَا مِنَ الْمُشْرِكِينَ (79)وَحَاجَّهُ قَوْمُهُ "

أكيد طبعًا هيلاقي اللي يعارضه في طريقة تفكيره .
لكن دعمه كان كبير.
دعمه كان رب العباد .

ولأنه إتعلم صح قدر يرد علي يرد علي النمرود في سورة البقرة
آية 25
وفي الاخر ربنا قال عنه "إنَّ إِبْرَاهِيمَ كَان
َ أُمَّةً قَانِتًا لِّلَّهِ حَنِيفًا وَلَمْ يَكُ مِنَ الْمُشْرِكِينَ "


* أنا مين *
عنوان حلقتنا النهاردة.

كتير مننا بتتوجع دماغه من أسئلة ولاده اللي مبتخلصش وأحيانا بنخاف منها وبنتجنب الرد عليها كمان زي
بابا هو فيه حياة علي الكواكب التانية؟
طيب يابابا هو ليه في ربنا ؟
هي فين الجنة؟
 ياتري الحيوانات تقدر تفهم كلامنا ؟
هو ليه إحنا إتخلقنا ؟
 ماما حبيبتي هو صحيح فيه أشباح بجد ؟
  وياتري اللي بيموت بيروح فين ؟
 مستر لو سمحت يعني إيه الحياة ؟
 جدو هو ليه في ناس أشرار ؟
  طيب هو ليه في الإسلام أصلا؟؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
 هنا بقي يرتبك الأب أو الأم ويحاولوا يتخلصوا من الاسئلة دية بأي طريقة ووسيلة ممكنة ليهم ....زي
الصريخ مثلًا
واستخدام بعض الألفاظ المرهقة لعقل الطفل واللي كتر استهلاكها من الآباء ممكن تدخل الطفل في مرحلة الصمت لإنه بيتخيل إنه حالة شاذة إستثنائية وإن الأحسن ليه السكوت.
ومن الألفاظ دية
"يييه وجعت دماغي" أو
" روح يابني شوفلك حتة تانية ألعب فيها " أو
اااااااه حراااااام هتروح النار " أو
" يالهوي يابني انت بتجيب الكلام دة منين أنا معلمتكش كدة "

ياحاجة استهدي بالله هو ربنا  خلقه كده خلقه عبقري إنت كدة بتدمريه لو علمتيه هتخليه عالم
تعالوا بينا نتعلم سوا

هاورد غاردنر صاحب نظرية الذكاءات المتعددة بيقول هاورد "
إن الذكاء الوجودي يعتبر مصدر قلق مع قضايا الحياة اليومية فهو يربط المعلومات بقدرته علي الحياة أي يربطها بنفسه إن الأطفال الذين يطرحون أسئلة قد يعجز الكبار  عن الإجابة عليها هم يفهمون معني الكون والإيمان أكثر منا نحن الكبار "
الله...
طيب ما ده نفس اللي حصل مع سيدنا إبراهيم  وكان أمة وكان أبو الأنبياء وكان خليل الرحمن.
عارفين ليه
لإنه لما سأل ولقي إجابة علي أسئلته.
طيب نتعامل إزاي مع الطفل اللي بالشكل دة. 
 غاردنر سمي ذكاء الطفل دة ذكاء وجودي
وهقولكم سر التعامل معاه إن شاء الله إزاي بس للي هيطبقه .

ويلسون قال " الإيمان هو الطائر الذي يشعر بالضوء ..ويغني بينما الفجر لا يزال ظلام..في الواقع الناس الذين يغيرون حياتنا من أكثر الناس بداية بالغناء لنا إذا استمعنا إلي غنائهم سوف نري بزوغ فجر جديد في حياتنا."
الله ..كلام جميل جدا
 كمان إبنك لو سمعته ممكن يغير الكون كله بسسسس لو سمعته واديته الثقة في نفسه الاول والفرصة إنه يخرج كل اللي جواه .
وقبل ما نعرف إزاي نتعامل معاه لازم نعرف سمات الطفل الوجودي الأول
— " يبحث عن موقع نفسه من خلال الصفات البشرية اللازمة لمعني الحياة زي الحب من شخص آخر وإهتمامه بالأخرين "
—علشان كدة بتلاقيه بيسأل كتير أوي وبنلاحظ عليهم حاجة إسمها الحاسة السادسة .
.— وكمان بيخرج منهم علماء النفس والادباء وعلماء الدين والروحانين

أما  التعامل معاهم بيكون سهل جدا

1 . النوعية دي من الأطفال بتتعلم بشكل افضل لما بتديهم فرصة يعبروا عن رأيهم.

2 . هو عايز دايما يجمع المعلومات ويبتكر افكار ساعده علي كده وإبحث واتعلم معاه إنت كمان .
3 . بتلاقيه بيهتم أوي بتكوين صداقات وعلاقات إجتماعية جدًا وبيدي إهتمام كبير للاشخاص خليك معاه  وساعده لانه ممكن يتصدم بسهوله من الناس.
4 .  قبل ماتديله تعليمات وأوامر إديله فكرة عن أسبابها.
5 . إتناقش معاه دايما وخد رأيه في مواضيع مهمة بتحصل في البيت، المدرسة، الشغل كمان لو ينفع.
6 . علمه ان كل معلومة وليها وجهات نظر مختلفة ياتتفق مع رأيك أو تختلف .
تمام
إنتهت الحلق النهاردة بس

  أنا
لسة ما انتهاش

مستنية رد فعلكم ورد فعل ولادكم
واعتبروها استراتيجية ويالا نطبقها سوا

ولا تنسونا ووالدينا ومن علمنا من صالح دعائكم

مع تحيات آيات أحمد منصور
السلام عليكم ورحمة الله وبركاته

أنا

الحلقة الخامسة

أنا

بثقتي وتفكيري

اتسلقت الجبال اميال

 أنا
بثقتي وتفكيري

لمست السحاب وغصت في أعماق البحار

 أنا

بثقتي وتفكيري

زرت زحل وكمان خدت لفة وسط المجرات

 أنا 

عبادتي سر وجودي وثقتي في

نفسي من ثقتي في دين ربي

★★★★★★★★★★

السلام عليكم ورحمة الله وبركاته

أنا

حلقات جديدة بنقدمها لكل اب وكل ام وكل مربي وكل فرد في المجتمع

 بنتعلم فيها مع بعض إزاي نزود ثقة ولادنا في نفسيهم

 ملحوظة...الحلقات دي مش للاطفال وبس ..
لا دي لينا احنا كمان
ومش لازم ابنك يطلع زيك تمام

 لان الاختلاف طبيعة البشر والاب الناجح اللي يقدر يفهمها ويقدرها كمان


قال تعالي

وَلَوْ شَاءَ رَبُّكَ لَجَعَلَ النَّاسَ أُمَّةً وَاحِدَةً ۖ وَلَا يَزَالُونَ مُخْتَلِفِينَ (118) إِلَّا مَن رَّحِمَ رَبُّكَ ۚ وَلِذَٰلِكَ خَلَقَهُمْ ۗ

خلق الله البشر مختلفين في اهتماماتهم واهدافهم كمان
حتي الطريقة اللي بيحققوا بيها ذاتهم

كمان أنبياء الله اختلفت طريقتهم في الدعوة وطريقة حياتهم

الا إنهم اتفقوا في الهدف  وهو طاعة الله عزوجل وتبليغ الرسالة.

سيدنا نوح عليه السلام دعا قومه 950 عام باليل والنهار والسر والعلن

وإبراهيم عليه السلام تفكَّر فايقن فدعا فكان أمة .

عيسي عليه السلام خرق كل العلوم اللي ظهرت في فترة نبوته بكلامه في المهد واحياءه الموتي وشفاء المريض بإذن الله

وموسي بعصاه وخوفه وقوته  ويقينه قضي علي اسطورة فرعون الإله

محمد صلي الله عليه وسلم تأمل وتفكر بدون أن يتعلم ثم وصل الي الحقيقة  وهي
وهم عبادة الأصنام ووجود خالق لهذا الكون عظيم.
فلما اتاه الوحي اتم عليه اليقين فدعا الناس بقوة حتي اتاه اليقين

وداوود عليه السلام أَحبَّ جميع المخلوقات فأحبوه وأحبوا ربه فسبحوه.
ففهمها وفهمته
زي الجبال والطير حتي الحديد ربنا ألانه ليه
وحتي صوته كان مزمار لحد الآن بيتحكي بيه سبحان الله .

" القلب الأخضر "
دة موضوع حلقتنا النهاردة

كنا اتفقنا مع بعض إنك لازم تؤمني بقدرات إبنك وتثقي فيها وتنمي اهتماماته وتخليها مراكز قوة وإنت طبعا يابابا اكيد بتساعدها كمان

الذكاء الطبيعي

حقيقي النوع دة من الذكاءات مشفتوش بصورة كاملة قبل كده لكنه اكيد موجود

  وده سبب اختياري ليه النهاردة وحبيت اتكلم عنه لانه نوع صامت

مش بيبان لكنه أكيد منتشر جدا 

 بنشوف منهم كتير في الدول الغربية لإن كتير من الآباء في الدول دية بيدوا اهتمام كبير لإكتشاف مراكز قوة أولادهم وينموها

طيب سمات الاطفال اللي عندهم الذكاء ده ايه...؟


الفئة دية من الاطفال بتلاقي عندهم قدرة عالية أوي في التواصل مع الكائنات الحية زي الحيوانات والنباتات

 ويقدر يميز بينهم بشكل ملفت

إتقال عن النوع دة من الأطفال إن بينه وبين الطبيعة

قصة حب

بتلاقي مشاعره رقيقة جدًا قدام الحيوانات أو النباتات وبيضايق جدًا لما حد بيأذيهم

وبالرغم من إن الآباء والأمهات ممكن يشوفو الذكاء دة بدائي شوية

 لكن له نشاط حيوي بين باقي أنواع الذكاءات التانية

وغاردنر صاحب نظرية الذكاءات المتعددة بيعتبره السبب في البقاء علي قيد الحياة

لإن النوع دة من الذكاءات بيهتم جدًا بالزراعة والصيد واللي هما العامل الأساسي في الحياة

نتعامل إزاي مع الطفل اللي ذكاءه من النوع دة
هقولكم علي السر بس......
للي هيطبقه


السر بقي مش باختصار خالص.
في رإيي الشخصي التعامل النوع دة من الذكاءات

1 . بإنك تعيش افكاره وتستشعر مشاعره وتتخيل نفسك مكانه.

أنا شخصيا النوع دة   أكتر الأنواع اللي محيراني لإني فعلا لم اشعر به

بس متأكدة لو نزلت موقع الحدث هبتدي احس بيه وأساعده إن شاء الله واتعرف عليه أكتر  .

2 . خليه يقري وإقروا معاه في كل حاجة تتعلق بالطبيعة .

3 . اسمعوا  كتير كلامه عن الحيوانات والطيور والنباتات وإدعموه.

4 . خده لموقع الحدث وراقبه وهو بيستكشف فيها وإتعلم منه.

4 . إكتشاف النوع دة من الذكاءات مش سهل  بالعكس سهل تقضي علي موهبته بس
هتلاقي نفسك قدام شخص فاضي لإن ربنا خلق إهتمامه بالطبيعة وهو بيلاقي نفسه وسطهم.

الحلقة النهاردة كانت صعبة شوية بس فعلا مشكلة بتهدد
" الأنا "

الخاصة بالطفل لو ما إكتشفنهاش وطورناها

هدفي منها إني أساعد الاطفال والكبار كمان باكتشاف الذات وتطويرها

تمام انتهت الحلقة النهاردة بس
بس
" أنا "

لسة ما خلصتش هنفضل مع بعض في المشاكل اللي بتواجه   
" الانا "

ونحلها مع بعض وعايزة اشوف رد فعلكم ورد فعل اولادكم

واكتشفوا ولادكم
ولا تنسونا ووالدينا ومن علمنا من صالح دعاءكم

أشوفكم الحلقة اللي جاية إن شاء الله.
مع تحيات آيات أحمد منصور
والسلام عليكم ورحمة الله وبركاته.

أنا

الحلقة السادسة

" أنا "

لازم أكون نفسي ومش مغرور

" أنا "

لازم أكون راضي عن نفسي 

" أنا "

كلامي كتير 

لكن له معني كبير

" أنا "

لساني فصيح

ساعدني أكمل وأكون بليغ

" أنا "

عباتي سر وجودي وثقتي في نفسي من ثقتي في دين ربي 

السلام عليكم ورحمة الله وبركاته 

" أنا "

حلقات جديدة بنقدمها 
لكل أب
وكل أم 
وكل مربي 
وكل فرد في المجتمع 

بنتعلم فيها إزاي نزود ثقة ولادنا في نفسيهم 
الحلقات دي مش لأولادنا بس لأ  دي لينا إحنا كمان 
 هنبدأ بمثال هيوضح لنا مضمون الحلقة كووولها 

بس .......يفهمها 


فصيح العرب

سحبان بن وائل رضي الله عنه

هو فصيح العرب وخطيب يضرب به المثل في البيان  والفصاحة أسلم علي عهد الرسول ولم يره 

ضرب به المثل في بلاغته حتي كان الناس إذا أرادوا مدح إنسان لبلاغته قالوا:

«هو أخطب أو أبلغ أو أفصح من سحبان وائل>>

  هو أوّل من قال: أمّا بعد، وأوّل من آمن بالبعث من الجاهلية،

مات سنة أربع وخمسين، وحكى الأصمعيّ عنه فقال :

كان إذا خطب يسيل عرقا ولا يعيد كلمة ولا يتوقّف ولا يقعد حتّى يفرغ .

وروي انه حضر ذات مرة مجلسًا لمعاوية فتكلم من صلاة الظهر حتي أقيمت صلاة العصر

لسة ..... ما تنحنح ولا توقف ولا سعل ولا بدأ في معني خرج منه لأخر. 

وقال له معاوية بعد حوار دار بينه وبين سحبان " أنت أخطب العرب فقال سحبان:
والعجم والإنس والجن."
واضح جدا ثقته واعتداده بنفسه من كلامه هو عن نفسه

الذكاء اللغوي 

 دة عنوان حلقتنا النهاردة 

الاطفال اللي من النوع دة بيمتلك ذكاء لغوي حاد 

زي سحبان بن وائل وويليام شكسبير
سمات الطفل دة إيه

يقدر يكلم مع كل الناس ويفهمهم سواء بالحديث او الكتابة

يقدر يتعلم اللغات المختلفة بطلاقة

عند موهبة إستخدام المفردات ومعاني الكلمات

بإستخدام أكتر من كلمة ليها معني واحد وهو بيعبر عن نفسه زي أنا بحب دية لكن بفضَّل دي، أنا بكره فلان وبضايق من فلان. 

 ماهر في وصف اللي بيشوفه
  وعنده موهبة فريدة في رواية القصص القصص

لكن للأسف بعض الآباء والامهات أحيانًا كتير بيقضوا علي الموهبة دية بمحاولاتهم المستميتة 

 في إسكات أولادهم بدل من توجيههم للأسلوب الصحيح في الحوار 

لإنهم أوقات كتير بيحرجوهم لمَّا بيواجهوهم بأخطائهم 

وبيلاقوا الطفل قادر يفهمهم حتي أكتر من نفسهم
".. بليغ.... " بقي تعملوا إيه 
بطل لماضة حاضر 

تعالوا شوفوا معايا مشكلة واحدة من مشاكل النطق وإحمدوا ربنا. 


التأتأة 

بتمنع الكثير من الأطفال وبعض الكبار كمان من المشاركة في أنشطة الحياة اليومية 
 لما يبدأ حوار يبتدي يظهر عليه التوتر 
والأضطراب وصعوبة في التنفس. 

وبتلاقي رد فعل الناس علي تأتأته إنها تبعده سواء بأسلوب كويس أو لأ عن أغلب أنشطة الحياة اليومية. 
مأساه مش كدة

 هو بيكون ليه علاج ؟؟؟؟
اكيد
وعلاجه بيكون إن إحنا نديله كلمات وجمل صغيرة تزيد بالتدريج مع أخذ نفس عميق ودة تحت مراقبة أخصائي تخاطب 
أما الثرثرة بقي كتير مننا بيعاني منها ومش قادر يسيطر عليها خالص

تعرف ان المتخصصين رأيهم إنها أحسن من الطفل الهادي علي طول الخط لإنه أكثر عرضة للإضطرابات. 

وعلي فكرة الثرثرة ممكن تتحكم فيها
بإنك تديله بعض المهام واللي تشغله عن كتر الكلام

احضنة لما تلاقي نفسك علي الاخر ومش قادر تستحمل

افتكر انك ممكن تكون السبب لانك لو راجعت نفسك هتلاقيك نفس النموذج وهو بس بيقلدك 

اهمس في ودنه باسرار كتير وعلمه يسمع لإنه غالبًا عنده مشكلة في الإستماع مش في حاسة السمع. 
هتلاقيه يستجيب إن شاء الله. 
شوفتوا بقي إن الذكاء اللغوي نعمة 

طيب ازاي أنمي فيه المهارة دية 
إستنوا هقولكم علي السر إن شاء الله بس
للي هيطبقه ........ 

السر بقي بإختصار شديد

1 .الطفل دة بقي بيتعلم بشكل أفضل من خلال القراءة وفر له مكان يقري فيه. 

2 . عنده مهارة حلوة أوي وهي التفكير نميها. 

3. ساعده يكتب قصة من كلمتين حتي وخلي العالم كله يشوفها وهو هيكمل وراك .

4 . ناقشه في الاحداث الجارية ومشاكل العالم كله .

5 .إشتركله في الإذاعة وساعده يقول اللي مطلوب منه. 

6 .إعمل له الغاز وإلعب معاه الكلمات المتقاطعة

تمام انتهت الحلقة النهاردة بس... 
أنا 

لسة ما إنتهتش 
مستنية رد فعلكم ورد فعل ولادكم 
واعتبروها استراتيجية ويالا نطبقها سوا. 
ولا تنسونا ووالدينا ومن علمنا من صالح دعائكم. 
اشوفكم الحلقة الجاية إن شاء الله 
مع تحيات آيات أحمد منصور 
والسلام عليكم ورحمة الله وبركاته

 

أنا

الحلقة السابعة

أنا 

حقي في قدراتي ألاقي صدق وإيمان 

 أنا  

بثقتي وتفكيري

إتسلقت الجبال اميال


 أنا 

بثقتي وتفكيري

لمست السحاب وغصت في أعماق البحار

أنا 

بدعمي وتشجيعي 

عرفت سر وجودي وزاد إيماني بدين ربي 

★★★★★★★★★★

السلام عليكم ورحمة الله وبركاته

 أنا  

حلقات جديدة بنقدمها لكل اب وكل ام وكل مربي وكل فرد في المجتمع 

بنتعلم فيها إزاي نزود ثقة ولادنا في نفسيهم

 الحلقات دي مش لأولادنا وبس
 لأ دي لينا إحنا كمان

واعرف إن العلم وسيلة تقرب بيها من ربنا

والرفق والعقل هبه للي يتحلي بيها

هنبدأ بمثال وخططوا إنتوا بعده 

قال رسول الله صلي الله عليه وسلم 
" لتفتحن القسطنطينية فلنعم الأمير أميرها ولنعم الجيش ذلك الجيش". 

محمد الفاتح

محمد الفاتح كان عنده إعتقاد شديد إنه يقدر يكون المقصود بالحديث
ودة بعد تحفييز كبير من المعلم والمربي اللي كان كتير بيكرر عليه الحديث
فكان محمد فاتح القسطنطينية 
بالرغم من إن العلماء إختلفوا في الشخص المقصود بالحديث إن كان محمد الفاتح أو لسة أخر الزمان هييجي بدون قتال
الله أعلم بالحال

تعرفوا إن محمد الفاتح من صغره كان عنده القدرة علي التخطيط 
 وإنه تولي حكم أحد الولايات وهو عنده 11 سنه وكان بيخطط من وقتها بقراءته ودراسته في تاريخ كل اللي سبقه. 

تعرفوا إن والده ساب له الحكم وهو عمره 14 سنة .
والبلاد وقتها كانت في خطر أكبر من إنه يقدر يواجهه لواحده وبالرغم من كدة معيطش لكن برده خطط إزاي يرجع والده يمسك الحكم مرة تانية  علشان ينقذ البلاد .

عبقري بقي

 كمان الثقة اللي تربي عليها أثرت في نفسه ومستقبله كله 
لانه كان دايما بيخطط صح 
وعلي أرض الواقع مش بس مجرد العاب وتمارين 
لأ دي
فتوحات وقوة تخطيط العالم كله لازم يدرسها ويتعلمها 
سواء في الحصار أو صناعة السلاح وتطوير المدافع وكان نقل السفن عن طريق البر أكبر دليل علي هزم المستحيل. 

أنا عبقري 

دة عنوان حلقتنا النهاردة  

واللي بتتكلم عن الذكاء الرياضي المنطقي 
 من كلام هاورد غاردنر حول تقسيمه للذكاءات :
" قد يتعلم الأطفال شيئا علي مدار السنة الدراسية ولكن بعد انتهاء العام يكون قد نسي كل شئ 
 أما إن دخل الأمر في حيز العمل وكتابة البيانات وتسجيل التنبؤات فإن الأمر سيختلف

 مثال علي ذلك الذي يدرس التاريخ ويكتب الوثائق بنفسه ويبحث ويقابل المتخصصين وعلماء التاريخ بنفسه ويكتب بحث بكل ما تعلمه بشكل إيجابي وصحيح هذا العلم يبقي في ذهنه علي عكس حفظه للمفاهيم والتعليقات "
رائع ياريت المدارس كلها تتعلم الكلام دة. 
الذكاء الرياضي المنطقي 

 الفئة المرة دي من الذكاءات بيبقي ملحوظ 

حتي أسئلته بتكون مميزة نوعًا ما. 

ليه يا بابا الصيف بيكون سخن والشتا علي طول دايمًا بارد؟ 
طيب إحنا إزاي أما بنوصل الكوبس في الفيشة بتيجي الكهربا ياتري ؟
ماما هو ليه البحر لونه أزرق ؟
يامستر هو الشتا بينزل إزاي ومنين ؟
سمعت النهاردة يا ماما عن الحمض النووي هو إيه دة تعرفيه ؟
طيب المحركات الكهربية ازاي بتشتغل؟
أمي فرن الميكروويف الكهربي إزاي بيسخن الأكل؟
أوووووه 
ههههه تعبت مش كدة 

أسئلة عباقرة بقي !!؟؟ 

حضَّر نفسك بقي وطول بالك وخليك شاطر وإتعلم معاه بقي وجاوب وأوعي تطنش. 

تعالوا شوفوا سمات الذكاء الرياضي المنطقي إيه

بس عندي سؤال قبل ما أقول لكم علي الصفات الخاصة بيه. 
إحنا ليه بنبحث في صفات أطفالنا ؟؟؟
ياتري علشان نتفاخر بيهم قدام الناس؟؟؟ 
ولا ياتري علشان يحققوا طموحاتنا اللي مقدرناش نحققها؟؟؟ 

لأ أبدًا أولادنا رسالة وعمل صالح إنت اخترته لنفسك ولازم تقدمه لربنا صح  علشان ربنا يتقبله منكم. 
وإفتكروا إنكم هتتسألوا علي المسئولية دي قدام ربنا. 

وعن سمات الذكاء الرياضي المنطقي هي 

الطفل اللي من النوع دة مريح نوعا ما 
إزاي هقولكم حاضر 

1 . منظم بيحب الترتيب في جميع جوانب حياته. 

2 .بيهتم بالأرقام والعمليات الحسابية وعمل الجداول والعلامات . 

3 .قبل ما يعمل أي حاجة لازم يخطط لها ويعمل لها استراتيجية تقولش داخل حرب .

4 . بيحب جدا الألعاب اللي فيها تخطيط زي الشطرنج والدمونو وألعاب الكمبيوتر اللي بتعتمد علي التخطيط والإستراتيجيات .

5 . دماغه دايما شغالة عنده قدرة علي التفكير في كل حاجة قبل ما يعملها 

جميل مش كده 

طيب الذكاء اللي من النوع ده أطوره وأستغله إزاي؟؟؟ 

هقولكم علي السر بس..... 

  للي هيطبقه 

السر بقي بإختصار

 النوع ده من الذكاء نقدر نطوره
لو إتبعنا النصايح دي. 

1 . شاركه في الألعاب اللي بتعتمد استراتيجيات وخطط أو علي الأقل وفرها له .

2 . هات ألغاز وحلها إنت وهي وشغل دماغك ودماغه. 

3 . علمه البرامج الأساسية للكمبيوتر. 

4 . خده وزوروا المتاحف والآثار علشان تتعلموا. 

5 . إقروا مع بعض الصحف وخصوصا الإقتصادية .

6 . ساعده علي القراءة والبحث العملي اللي يساعده في التعلم وإشباع فضوله العلمي. 

 تمام ...إنتهت حلقتنا النهاردة لكن 

" أنا " 

لسة ما إنتهتش عاوزة أعرف رد فعلكم ورد فعل ولادكم

وإعتبروها إستراتيجية ويالا نطبقها سوا. 

ولا تنسونا ووالدينا ومن علمنا من صالح دعائكم. 

أشوفكم الحلقة الجاية إن شاء الله

مع تحيات آيات أحمد منصور 

والسلام عليكم ورحمة الله وبركاته

 

أنا

الحلقة الثامنة

انا الحلقة الثامنة 

أنا 

حقي أكون نفسي ومش مغرور 

أنا

وحدي لا هقدر أكون نفسي ولا ذاتي

أنا 

تصاميم دماغي كدة خلتني أكون
عِشري مش ذاتي 

أنا 

صحيح محتاج نجدة وإنقاذ لكن 
بدعم إيجابي مش سلبي بصوت وخلاص 

أنا 

إنساااااان 

السلام عليكم ورحمة الله وبركاته

أنا 

حلقات جديدة بنقدمها لكل
أب وكل أم وكل مربي وكل فرد في المجتمع

  بنتعلم فيها إزاي نزود ثقة ولادنا في نفسيهم .
 الحلقات دي مش لأولادنا إحنا بس... 
 لأ دي لينا إحنا كمان 

ربنا خلقنا إحنا وأطفالنا وزرع جوانا مشاعر كتير زي الحب والكره كمان .

وافتكروا أنا من غير عواطف ولا أصحاب جماد في صوت إنسان.

العواطف كنوز مش بس كلام 

هنحلها إن شاء الله سوا

الرسول صلي الله عليه كان مثال حي للذكاء الإجتماعي

ولو دققنا كويس هو كان مثال لكل الذكاءات اللي خدناها واللي لسه هناخدها 
بعد كدة إن شاء الله 

وذكاءه الإجتماعي دة ظهر في عدة مواقف هنذكر منها 

موقفه مع الصحابي زاهر واللي كان دميم لكن الرسول صلي الله عليه وسلم لم ينسي إنه يمده بالحب والدعم 
وكان أكبر فخر للصحابي زاهر بشارة الرسول ليه من ربنا بشري سماوية مش بس كلام
دة الرسول بشره بانه عند الله غالي

عقبالنا كلنا يارب آمين
**************************
 ولما أعرابي كان عايز ياخد من مال الغنائم زيادة شوية شد الرسول صلي الله عليه وسلم من ردائه لدرجة آذت عنق الرسول بشدة . 

فضحك النبي وأمر بإعطائه المال اللي محتاجه ولم يأمر بقطع رقبته 
  ودة لإنه نبي رحيم بيفضل الاخرين علي نفسه اجتماعي بيحب أصحابه وكمان يثق في نفسه 
**************************
 وكمان من حسن معاملة الرسول صلي الله عليه وسلم لأصحابه كان كل واحد بيظن إنه الأغلي في قلب الرسول

وعلشان كده سأله عمرو بن العاص عن أحب الناس إليه بعد المهمة الصعبة اللي قام بيها واللي إسمها ذات السلاسل ظن وقتها إنه أغلاهم عند الرسول صلي الله عليه وسلم .

ولكن لم يستحي الرسول صلي الله عليه وسلم أو يكره إظهار حبه لعائشة مباشرة وأمام أصحابه وقال إنها أحب الناس إليه .

ولكن انتظر عمرو بن العاص لعله يكون التالي فذكر الرسول صلي الله عليه وسلم رجالا. 

امممممم يابختهم يارب إحشرنا معاهم آمين 


الذكاء الاجتماعي - التعاطف = العدوان؟

 دة عنوان حلقتنا النهاردة 

 واللي هنتكلم فيها عن الذكاء الإجتماعي أو العاطفي 
 أي شخص طبيعته إجتماعي لازم يكون غالب عنده العاطفة. 

ولو إتفقدت عنده العاطفة هيتحول مباشرة لشخص عدواني وعنيف 
 وإنتم بقي شغلتكم توصلوا العاطفة دية لولادكم بشكل مقبول. 
وإلا...... هيدوروا عليها بره. 

ونفس الكلام  لو كانت فيه عاطفة لكن مفيش علاقات إجتماعية
هيفقد الطفل لطريقة التواصل مع اللي حواليه نهائيًا ويقفل علي نفسه حتي لو كان وسط جمهور من الناس ويبقي عرضة للاضطرابات النفسية والعقلية كمان 
ومثال علي كدة اضطراب التوحد
  واللي بدأ ينتشر
إما لعوامل وراثية او 
لفقدان البيئة الاجتماعية 
واللي الاسرة مقدرتش توفرها لطفلهم. 
أو لكثرة بكاء الأم وإصابتها بالإكتئاب بدون بديل يخرج الطفل أو الأم من الحالة دية. 
ودة مش كله كلامي دة كلام علماء ودراسات وابحاث
وظهر الموضوع دة في تصميم الدماغ اللي اثبته علماء الاعصاب .

 بإنك كل ما بتقرب من شخص ويزيد الترابط بينك وبينه بتتكون عاطفة ومشاعر بين الطرفين
العاطفة دية بتكون واضحة حتي مع وجود بعض التوترات في العلاقة. 
زي  تعلق الطفل بالمعلم بتاعه حتي لو كان عصبي لإنه إتكون ارتباط بينه وبين المعلم بتاعه .
وبرده الام بتحب ابنها دة صحيح 
 لكن مفيش تواصل ولا إرتباط بالتالي مفيش رابطة بين الأدمغة وهنا بتزيد الإضطرابات وبتنتشر. 


 والحل هنا هنمر فيه بمرحلتين : 

الأولي : هنتعرف فيها علي صفات الذكاء الاجتماعي ونميها 
الثانية :وهي إزاي أساعد طفلي إنه يكون إجتماعي 

 يالا بينا مع بعض نحلها

سمات الذكاء الاجتماعي

زي ما وضحها الدكتور هاورد غاردنر بتكون كالآتي :

1 . ما شاء الله يقدر يكسب أصحابه بسهولة . 

2 . مش بس كدة دة بستخدم ذكاءه عليهم حتي في اللعب ويسيطر عليهم .

3 . يقدر يفهم ويتواصل مع اللي حواليه كويس جدًا مهما بلغ عمرهم.

4 .القدرة الجميلة دي علي التواصل بتكون إما بالطرق اللفظية بالكلام يعني أو غير اللفظية بالتعبير بالنظرات مثلًا. 

5. يقدر يفهم الأشخاص بسهولة ويعرف هما عايزين إيه. 

6 . يقدر يفهم وجهات النظر مهما إختلفت.

7 . كمان يقدر يكون قيادي ويسيطر علي أصحابه بلطف طبعا .

بيخرج منهم السياسين والأخصائيين الإجتماعين والمعلمين

خدتوا بالكوا مليانين قدرات 
وعلشان نحافظ علي مستوي ذكائهم الإجتماعي .

 الحل في مقولة 
Sumitha Bhandarkar .

عندما اسألك عن السماء
 تقول زرقاء
عندما أسألك عن الليل
تقول ظلام 
عندما أسألك عن الإنضباط
تقول عقاب

 دة تفكير سلبي 
في اللاتينية معني كلمة انضباط
تدريس وتترجم حرفيا إلي تلميذ
 علموهم وبلاش تضغطوا عليهم وتهدموهم 

تقوية المهارات الإجتماعية 

المهارات الإجتماعية لا تحتاج مساعدة إنما ممارسة

وكمان المهارات الإجتماعية بتختلف بإختلاف السن

لإن كل سن وليه مهاراته التنموية 

 زي ما قالت دكتورة سوزان ألماس دكتورة الطب الشرعي للنطق واللغة في تقسيمها للمهارات الإجتماعية.

تنقسم المهارات الإجتماعية إلي ثلاثة مراحل 
الأولي : تحديد المهارات الاجتماعية التي تحتاج إلى تطوير

وبتختلف باختلاف العمر 
سواء رعاية لفظية أو جسدية من المحيطين للطفل اللي عنده 3 سنين

أو تواصل من خلال الألعاب للطفل اللي عنده 4 سنين 
وكل ما زاد العمر إتغيرت المهارات 

الثانية : معرفة طرق تعليم المهارات الإجتماعية 
ودة بإستقبال أصحابه من الضيوف ومناوبتهم في اللعب والتعليم 

أو قراءة القصص وتشغيل أفلام الكرتون اللي تساعده يتعرف علي مشاعر الأخرين 

الثالثة :تعزيز الدروس بالموارد المناسبة
ودة بتعليمه فهم مشاعر الآخرين 
بالرد عليهم بشكل سليم 
وعمل حوار قصير معاهم

ولو لسة المشكلة موجودة مفيش مانع ندَّخل وهنا المساعدة بتكون مطلوبة
تمام 
انتهت الحلقة النهاردة بس 

أنا 

لسة ما إنتهتش
مستنية رد فعلكم ورد فعل ولادكم 
وإعتبروها إستراتيجية ويالا نطبقها سوا

ولا تنسونا ووالدينا ومن علمنا من صالح دعائكم
مع تحيات آيات أحمد منصور

والسلام عليكم ورحمة الله وبركاته

 

أنا 

الحلقة التاسعة

انا الحلقة التاسعة 
أنا

لازم أكون نفسي ومش مغرور 

أنا

لازم أكون راضي عن نفسي 

أنا

حركتي كتير بمهارة ممكن أكون إنقاذ كبير

أنا

جسمي مرن لكن بنيانه أكيد متين 

أنا

نفسي أكون إنسان عظيم 

أنا

حلقات جديدة بنقدمها لكل أب وكل أم وكل مربي وكل فرد في المجتمع

بنتعلم فيها إزاي نزود ثقة ولادنا في نفسيهم. 

الحلقات دي  مش لأولادنا بس لأ دي لينا إحنا كمان. 

الحركة نعمة والفهم نعمة وأولادنا نعمة

حافظوا علي نعم ربنا وإوعوا تهدروها 

هبدأ بمثال هيوضح هدفي من الحلقة دي كووولها بسس... للي يفهمها 

موسي عليه السلام

 كانت سيرته أكتر سيرة وردت في القرءان بأحداث وقصص مختلفة
  
قصته مع فرعون وقومه .
قصته  مع شعيب .
 قصته مع بني إسرائيل .
 قصته مع الخضر .
 حتي كلامه مع رب العباد كان ليه قصة .

كان سيدنا موسي من وهو صغير حركي حركته كانت سابقة كلامه أو حتي تفكيره مع إنه كان بيفكر كويس برده. 
ودة لإن 
ربنا هو اللي صنعه وقال رب العزة عز وجل عنه 
" واصطنعتك لنفسي " 
وقال " ولتصنع علي عيني " 

ربنا صنعه كدة خلقه فيزياء دماغه شغالة ما شاء الله ونشطه علي طول الخط .
أول ما يفكر لازم يشتغل علي طول سبحان الله. 
ودة ظهر في عدة مواقف 

  " قصة الجمر والتمر " ولو إنها من الإسرائيليات بس ماشي لينا ناخد بيها .

طبيعة بنية جسمه كانت قوية 
" فوكزه موسي فقضي عليه" 
كان جسمه حركي "إن خير من إستاجرت القوي الأمين" طبيعة جسمه مرن قوي سهل الحركة .

 وحتي لما تباطأ قومه للقاء ربهم قال " وعجلت إليك ربي لترضي " وسبقهم بالفعل لإنه طبيعة صناعته نشيط. 

صناعة ربانية بقي
  لم يحرم من حنان أمه
وإتربي تربية الملوك
 وكلم الله موسي تكليما مش وحي وبس. 
وقال عنه رب العزة عزوجل 

 " وألقيت كليك محبة مني " 

 فكان موسي كليم الله. 

" وعجلت إليك ربي لترضي" 

فيزياء الدماغ

دة عنوان حلقتنا النهاردة واللي هنتكلم إن شاء الله عن 

الذكاء الجسمي أو الحركي 

 من وهو بيحبي بيمسك 
كل حاجة في سكته مش بيسيب ولا بيفوِّت

ولما كبر شوية زادت العملية وبقي ممكن يعرض نفسه للخطر زي
إنه عايز يلمس المكواه ويحط إيده في الكهرباء ويشد المفرش باللي عليه. 
لازم أكون مصحصحة وإلا هتحصل كوارث  

  ممكن ألاقي كل حاجة مدشدشة في الأرض وممكن يأذي نفسه كمان لا قدر الله .
مش بيهمد ولا يهدي حركة متواصلة 24 ساعة .
أنا بس خايفة عليه ساعات بتنرفز عليه أه صحيح بس فعلا أنا بحبه جدًا والله. 
الله
حلوة أوي الكلمة  دي
الله يباركلك كدة نقدر نتفاهم مع بعض علي أرضية مشتركة . 
تعالي نتعرف علي إبنك مع بعض ونحلها سوا. 
تعرفي إن إبنك ذكاءه من النوع الجسمي الحركي. 

يعني مش بيعرف يتعرف علي حاجة إلا أما يلمسها بإيديه
  نشاطه زايد صحيح بس عايز منك شوية مساعده .
تاخدي بإديه إنت وبابا طبعا علشان يقدر يتحكم في نفسه ومتحصلش تطورات غير مرغوب فيها بعد كده

 هو زييه زي الطفل العدواني اللي طبيعته حساس بشكل مفرط لكنه ملقيش حد ينظم له مشاعره فانفجرت بيه هو واللي حواليه .
برده هنا الطفل حركي بس لو مخدتيش بالك من حركته ونظمتيها من بداية إكتشافها ممكن تنقلب لإضطراب يضره بعد كدة لا قدر الله. 

 تعرفي إن الطفل اللي ذكاءه حركي فيزياء خلايا دماغه بتطلع موجات شبيهة بالموجات الكهرومغناطيسية بين العقل الواعي واللا واعي. 

بتخلي كل حلوله للمشاكل اللي بتواجهه حركية  ولازم من صغره ننظم حركته دية  .

طيب إزاي أنظم حركته وأستغلها صح 

 استني أقول لك علي سمات الذكاء الحركي وبعدها نعرف الحل مع بعض. 
كل مرة بنتكلم علي نوع مختلف من أنواع الذكاءات لكن إيه هو الذكاء ياتري 
الذكاء هو
قدرة الفرد على إستيعاب عملية وإسترجاع المعلومات .
لكن... 

التليفزيون و الكمبيوتر والالكترونيات بشكل عام

أحدثت في حياتنا حالة من الخمول والعجز الحركي وسببت لنا أمراض كتيرة زي 
القلب ومشاكل الجهاز التنفسي والسكتات الدماغية وغيرها كتير نسأل الله العافية. 

 إحنا عندنا آلات متطورة دة صحيح لكن
بتنقصها الحركة علشان تزدهر وترفعنا وتوصلنا للنجاح .
حتي المدارس بتعتبر حصة التربية الرياضية من الزيادات والكماليات وبتستبدلها بحصص تانية أكاديمية زي الهندسة والجبر. 
حركة الأطفال نعمة ممكن نستغلها ونستفاد منها كمان بسسسس .
لو راعيناها ونظمناها .

أما عن سمات الذكاء الجسمي الحركي 

- بيتعلم بشكل أسرع من خلال اللمس. 
  - بيستجيب الاوعي عنده لأي مثير مادي عن طريق اللمس. 
  - حتي مشاعره وأفكاره بيعبر عنها بالحركة غير اللفظية. 
- جسمه متوازن بيتحرك بخفة ومرونة وبراعة مختلفة عن أقرانه. 
  - قدرته علي التعلم بتعلي وبتبقي مثمرة أوي بالممارسة مش بالشرح والكلام. 
يعني لازم يجرب بنفسه. 
- كمان بيستمتع باللعب الجماعي. 
- بيتحرك كتير لكن عقله شغال وردود فعله الحركية تمام. 

جميل طيب أتعامل معاه إزاي بقي 

حاضر حقولك علي السر إن شاء الله بس للي هيطبقه . 

السر بقي بإختصار شديد

1. دمج الألعاب التفاعلية في التعليم واللي بيشترك فيها أكتر من فرد. 
2. التدريب علي إستخدام اليد في تعلم الرياضيات. 
3 . إشترك له في لعبة تعتمد علي الحركة زي السبحة أو الجري مثلا .
4 . سيبله مساحة إنه يحس ويشعر ويجرب اللي بيتعلمه زي التاريخ مثلًا وديه متاحف وهاتله قصص مصورة بتتكلم عن اللي هيتعلمه. 
5 .خده كتير للعب في الهواء الطلق وده بيفرق معاه أوي. 
6 .خليه يلعب دور الشخصية اللي بيتعلمها هتثبت عنده الذاكرة طويلة المدي. 
7 . ساعده يشرب سوايل دافية كتير وننبههة قبل كل حركة خطرة هيعملها وإشرح له خطورتها وأضرارها وبكدة إنت بتشغل عقله مع حركته. 

لسة كتير دوروا عليه إنتوا بقي
بيخرج منهم الفيزيائين والضباط والحراس ورجال الإطفاء والإسعاف والراقصين
والمهن والأعمال اللي بتحتاج ردود فعل حركية مع تشغيل الذهن .

تمام إنتهت الحلقة النهاردة بس أنا لسة ما إنتهتش مستنية رد فعلكم ورد فعل ولادكم . وإعتبروها إستراتيجية ويالا نطبقها سوا . ولا تنسونا ووالدينا ومن علمنا من صالح دعائكم .

 تحيات آيات أحمد منصور

والسلام عليكم ورحمة الله وبركاته

 

أنا 

الحلقة العاشرة

" أنا " 

بثقتي وتقديري 
زادت بصيرتي وشوفت كتير من الأسرار

" أنا " 

بثقتي وتقديري 
بنيت مدن وخضت الإنتصارات

" أنا " 

حاد وعندي بعد نظر
حافظ عليا ممكن أكون جراح عظيم 

" أنا " 

بثقتي وأحلامي 
راضي عن نفسي 
طبعا ماهو سر وجودي هو ثقتي في دين ربي 

السلام عليكم ورحمة الله وبركاته

أنا " 

 حلقات جديدة بنقدمها
لكل أب 
وكل أم
وكل مربي
وكل فرد في المجتمع
 بنتعلم فيها إزاي نزود ثقة ولادنا في نفسيهم 
الحلقات دي مش لولادنا بس لأ  دي لينا إحنا كمان 
العلم نور حتي لو كان مجرد أحلام 
والأب والأم اللي عارفين يربوا ولادهم صح. 
ويقدَّروا قدراتهم وينموها نعمة من رب العباد .

هننبدأ بمثال هيشرح قصدي من الحلقة كووولها 

نوح عليه السلام كان بيشتغل نجار 
وبني أكبر سفينة في الصحراء  بأبعاد وتخطيط محترف 
السفينة اللي بناها سيدنا نوح قدرت تتحمل طوفان عظيم 
 إلتهم العالم كل حاجة مسابش لا جبل ولا حيوان ولا حتي إنسان غير.... اللي ركبوا سفينة نوح . 
تخطيط حكيم وسليم عقله بارع مش كدة. 
نفعه لما استخدمه في سبيل الله وكان من الفايزين . 
************************
في حين قوم ثمود برده كانوا بارعين كانوا بينحتوا الجبل يخلوه بيت يسكنوا فيه.

والسهل اللي أقل من الجبل يصنعوا منه أجمل قصور. 
كانوا فعلا عباقرة لإنهم قدروا يحددوا أبعاد وحدود السهل والجبل
وينحتوا منهم بيوت وقصور بشكل رائع ودقيق أبهر العالم لحد الآن بيتحكي علي براعتهم ومهارتهم. 

 بس للأسف قوتهم وقوة بصرهم دية منفعتهمش لما كفروا وظلموا 
وماتوا بحاسة تانية خالص مكنوش عاملين حسابها هي حاسة السمع.

ربنا يعافينا وإياكم ويرزقنا الدرجات العلا من الجنة آمين 

"مد البصر "

 دة عنوان حلقتنا النهاردة واللي هنتكلم فيها إن شاء الله عن "الذكاء البصري أو المكاني"

بس يالا بينا الأول نشوف السيناريوا دة مع بعض واللي بيحصل حقيقي من بعض الأمهات مع أولادهم 

بيكسر لعبه وبيدغدغدها كمان وقال إيه فاكر نفسه عبقري وهيركبها تاني . 

بيخبي كل حاجة وفي نفس الوقت عارف مكانها فين .

قالب البيت بس بصراحة عنده استعداد يرجعه تاني. 

طيب رد فعلك إيه إنت وبابا 
هاه 

ليه السؤال المحرج دة 
تابعوا معايا كدة 

 وديت الحاجة فين يابني أبوك زمانه جاي وهيبهدلنا. 

كدة هديت البيت حرام عليك دا أنا تعبت فيه الله يهدَّك ياشيخ 

أوبس 

كدة كسرت اللعبة دي لسة جديدة
أقول إيه بس شيطان

خبيت الفلوس فين كدة تدفسها الله يهديك.

أيواااا أيوة كدة الله يهديه ويهديك انت كمان معاه. 
  
 لإنك دمرت جواه عالم أو جراح أو مهندس معماري مفيش زيه إتنين. 

 إبنك بيمتاز بالذكاء البصري المكاني

وعايزك تساعديه وتكتشفي قدراته لأنه هو نفسه مش عارف هو بيعمل كدة ليه. 

 هو مش عايز يزعلك 
بالعكس عايزك تحبيه بس دية حاجة خارجة عن إرادته مش قادر يسيطر علي نفسه

  لازم تكتشفيه وتعرفي قدراته وتنميها وإنت بكدة تبقي زودتي ثقته في نفسه وكسبتيه معاك . 
إه يعني تقصدي إن عاميله دي كلها ذكاء؟؟؟ 
دة أكيد 
طيب معلش طولي بالك عليا شوية وخديني علي أد عقلي .
لما هو ذكاء أتعامل معاه إزاي بقي وإكتشفه هقولك حاضر .
بس الأول هقولك علي سمات الذكاء البصري .
وبعدها أقولك إزاي تتعاملي معاه إن شاء الله. 

  سمات الذكاء البصري المكاني 

1 . يقدر يشوف بثلاثة أبعاد أساسية في وقت واحد .

2 . خياله واسع لكن ديناميكي في الفك والتركيب. 

3 . يقدر يعالج الصور ويعرف الأخطاء فيها حتي لو كانت الصور دي ذهنية أو مرسومة .

4 . يقدر يفتكر مكان كل حاجة فين مهما خفاها ألعاب أو فلوس. 

 بس خدي بالك منه لو أقل من سنتين لأن اللغة عنده أقل من غيره واللي يروح مش هيرجع.

5 .بيحب أوي اللعب والأنشطة اللي بتحتاج قوة ملاحظة زي ألعاب الفيديو اللي فيها أبعاد كتير. 

6 . ببحب الفك والتركيب .

إبنك  العقل الفذ للمهندسين والمعماريين. 

إبنك  هو الإرادة التي تسمح للكيميائي للتفكير في هيكل ثلاثي الأبعاد للجزيء .

إبنك  هو الجراح اللي بيتنقل في جسم الإنسان من غير ما يشوف .

إبنك  هو مايكل أنجلو لما إتصور النحت في المستقبل داخل قطعة من الحجر.

بس هو بيعمل حاجات بتخرجني عن شعوري بحركاته. 

 ده مش بإرادته لأن ذكاءه البصري هو وظيفة أساسية للجانب الأيمن من الدماغ .

إبنك  يقدر يتقن مهارة قيادة الحرب في أرض المعركة أو الشطرنج ويقدر يتوقع تحركات خصمه كمان . 

طيب خلاص ربنا يهديني ويسامحني طيب أتعامل معاه إزاي بقي وأطوره. 

هقولكم علي السر بس للي هيطبقه .


وإفتكروا إن في أدلة بتقول إن القدرة المكانية مرتبطة جدا بكمية هرمون التستوستيرون لدي الجنين في الرحم.

أما سر التعامل معاه بقي بإختصار شديد. 

1 . يسمع منك مصطلحات مكانية كتير زي
كبير ،صغير ، تخين، رفيع ،
تحت ، فوق، وسط، 

 متستغربش قولها وهو هيفهمك حتي لو أقل من 3 سنين صدقني. 

2 .قطَّع الصلصال إنت وهو أشكال وقوله كدة بالطول كدة بالعرض .

3 .خزِّني الأكل في أكياس وخليه يتصور معاك حجم الأكل يتناسب مع الكيسة ولا لأ.

4 .خبي الكورة وإستخبي معاها وإسأليه مكانكم فين فوق ولا تحت وسيبيه يتصور المكان. 

5 . شغل خياله واحدف الكورة وإساله ياتري أخرها فين. 

6 .إشتري له ألعاب خاصة بالفك والتركيب والبناء .

7 . إديله لفته بسيطة عن عن مشاكلك وطريقة حلها .

8 .إديله الغاز من سن صغير وساعده يحلها . 

9 .إرسم إنت وهو خريطة صغيرة لأوضته وسجل فيها الأماكن اللي بيخبي فيها لعبه . 

وبعدها هو هيكمل وراك ويعمل خريطة المدرسة وبعدها خريطة العالم إن شاء الله

10 .الدوران العقلي وبيتلخص في لعبة "تترس " دوروا عليها علي النت أو إشتروها من محل الألعاب.

تمام . 
إنتهت الحلقة النهاردة بس 

أنا 

 لسة ما إنتهتش

و متنسوش مستنية رد فعلكم ورد فعل ولادكم وإعتبروها استراتيجة ويالا نطبقها سوا. 
 أشوفكم الحلقة الجاية إن شاء الله 

ولا تنسونا ووالدينا ومن علمنا من صالح دعائكم .

مع تحيات آيات أحمد منصور

والسلام عليكم ورحمة الله وبركاته

 

أنا 

الحلقة الحادية عشر

أنا الحلقة العاشرة 

أنا 

حكيم زماني وفيلسوف عصري 

أنا 

الصمت عنواني والسمع موهبتي 

أنا 

سمعت كلام ربي بوداني وبقلبي
أنا صدقته 
وبعلمي وعملي أنا طبقته 

أنا 

مش خطير لكن ممكن أكون
قاضي أو لقمان الحكيم 

أنا 

حلقات جديدة بنقدمها 
 لكل اب 
 وكل ام 
 وكل مربي
  وكل فرد في المجتمع 

بنتعلم فيها ازاي نزود ثقة ولادنا في نفسيهم 

 الحلقات دي مش لولادنا بس لأدي لينا إحنا كمان .

 السمع نعمة 
والصوت نعمة
  بس مش بيتفقوا مع بعض لو الصوت زاد عن حده شوية. 

والحكمة أولها تفسير الكلام . 

هنبدأ بمثال أجمل ما في الحلقة.   كوووولها بس للي يفهمه. 

ففهمناها سليمان 

سليمان الحكيم 

 .قصة حدثت في حكم داوود عليه السلام 
أحد النساء أكل الذئب طفلها لكنها ما استحملت الصدمة فأخدت طفل تاني من أمه وإدعت إن اللي مات مش طفلها وإشتعل الخلاف بين الإثنين الأولي كبيرة والتانية صغيرة. 

 سيدنا داوود حكم للكبيرة ورفض إدعاء الصغيرة اللي هي الأم الأصيلة 

وقتها كان سيدنا سليمان حاضر صامت بيسمع ويري وإستأذن في الحكم في القضية. 
وأمر بحاجة عجيبة أوي .
عارفين أمر بإيه
أمر بشق الطفل بالسكين نصفين. 
في اللحظة دي 

بكت الأم الأصلية وقالت "يرحمك الله هو ابنها لا تشقه"

وبكده إتعرفت الأم الحقيقية وإترد الطفل لأمه بعد غياب . 

ودة لأن سيدنا سليمان الحكيم سمع  وسكت وشاف وإستنتج ثم ...حكم. 

وكمان ربنا في القرءان مدح سيدنا سليمان 
ولم يعاقب سيدنا داوود 

 لأنه مكنش ليه مصلحة هتعود عليه من حكمه 
 سيدنا سليمان في ترجمته ليه قصص تانية كتير بتدل علي حكمته
  كان بيسمع فيها لحكم أبوه داوود عليه السلام. 

 بعدها يتحري بنفسه بشكل دقيق ويعيد من تاني. 
دة لأنه من البداية سمع وسكت وشاف
وبحث عن الحق بطريقته. 
حكيم بقي.. 
حاسة السمع  عنده كانت رهيبة 

ما هو كان بيسمع مزمار داوود. 
 حتي النملة قدر يسمع كلامها وإبتسم وحمد ربنا علي نعمته. 

 إنه سليمان الحكيم

  السمع وموجات الدماغ 

 ده عنوان حلقتنا النهاردة 
واللي هنتكلم فيها عن

الذكاء الموسيقي 

واللي هو متعلق بحاسة السمع واللي بتكون عند بعض الأطفال دقيقة جدا

حتي قبل أما يتولدوا وهما لسة في الرحم. 
بيتأثر النوع دة من الأطفال بشكل عنيف جدًا بالأصوات العالية أو الصاخبة. 

واللي كتر تعرضه ليها بتخليه يتجاهل تماما حاسة السمع ،اللي هي أصلًا بتأذيه. 

إزاي بيتجاهلها ؟؟؟؟
وإزاي الأصوات العليا بتأثر عليه؟؟؟؟؟ 
ما كل البيوت فيها مشاكل. 
تمام
 هفهمك حاضر 

 أدمغتنا فيها موجات مسئولة عن الأنشطة اللي بيقوم بيها العقل وكمان بتساعد في التركيز والموجات دي. 

موجات دلتا ،وثيتا ،وألفا، وبيتا ،وغاما.

 الموجات دية بتختلف تردداتها بإختلاف النشاط العقلي للإنسان. 
 
 نشاط عقلي بطئ زي دلتا. 
  نشاط عقلي متصل وواعي لكنه غير نشيط زي ألفا . 
 نشاط عقلي عالي بشكل كبير زي بيتا واللي بتساعدنا علي التفكير والنظر والإستماع .
أما غاما بقي فهي أعلاهم نشاط. 
وثيتا فهي المسئولة عن الأحلام وتقدر تسحب عمل كل الحواس حتي وإحنا صاحيين .

الموجات دية  بشكل عام مسئولة عن التركيز في عقل الإنسان

واللي بتأثر في حواس الإنسان وحواس الإنسان بتأثر في نشاطها برده. 

وبكدة نعرف إزاي قدر الطفل يستغني عن حاسة السمع مع إنه بيسمع كويس جدًا .
وبعدها يفقد التركيز تماما والإنتباه كمان وممكن توصل إنه يفقد حتي التواصل عن طريق الحاسة ديه .

وبينتج عن فقدانهم مشاكل وإضطرابات، كتير . 
الله المستعان 
وإنت بتفتكري إنه مولود غبي أو بيتجاهلك أو مش بيسمع كويس لأ دة كان ممكن يكون حكيم.

لو حافظتي علي نبرة صوتك إنت وبابا واللي حواليك شوية 

وسمات الذكاء الموسيقي بقي كالآتي : 

  - عنده قدرة فريدة في التميز بين الأصوات عن بعض . 
  - حتي أدواته يقدر يميزها عن بعض من خلال صوتها . 
 بيحفظ اللحن.. بسهولة .

  - يقدر يميز الصوت أو اللحن الشاذ برغم إن اللي حواليه مش مدركين لإختلاف الصوت . 
  - يسمع حاجات غيره مش بيقدر يسمعها .
- عنده حساسية مفرطة للأصوات المرتفعة .
  - يقدر يترجم اللحن والأصوات بسهولة ويعرف هي بتعبر عن إيه عن طريق الجانب الأيسر من الدماغ ودة علي خلاف الناس العادية . 
  - شاطر جدًا في مادة الرياضيات وحل المشاكل .
  - الأصوات الخارجية بتأثر في حالته المزاجية أوي . 
  - حساس جدا ورقيق في مشاعره. 

طيب وأتعامل معاه إزاي بقي؟؟ 
وأحل المشكلة اللي بدأتها معاه إزاي؟؟؟ 

هقولكم علي السر إن شاء الله 
 بس للي هيطبقه

السر بقي بإختصار شديد 

1. أهم حاجة حافظي علي نبرة صوتك إنت واللي حواليك ودة المفروض يبقي عادي حل المشاكل مش بالصوت العالي.

2 .علميه الحاجات المرتبطة بالألحان زي الأذان وحفظ القرءان والإنشاد مثلًا . 

3 . دايما تسمعيه أصوات القراء اللي صوتهم مميز .

4 . بيحفظ دروسه بسهوله لو متلحنة اتعلمي معاه وألفي بقي. 

5 .ابعد يا بابا عن التعامل معاه بعنف لإنك هتحطمه .

6 .جلسة الأعمي. 

 إنتهت الحلقة النهاردة 
أنا 

فاضلها 3 تلات حلقات وتنتهي إن شاء الله

مستنية رد فعلكم ورد فعل ولادكم واعتبروها إستراتيجية ويالا نطبقها سوا 

 ولا تنسونا ووالدينا ومن علمنا من صالح دعائكم 

مع تحيات آيات أحمد منصور

والسلام عليكم ورحمة الله وبركاته

 

أنا 

الحلقة الثانية عشر



والسلام عليكم ورحمة الله وبركاته

أنا

لازم أكون نفسي ومش مغرور

أنا

لازم أكون راضي عن نفسي

أنا

آمنت بنفسي وقدراتي
وزاد علمي بمشاعر الناس وإحساسهم

أنا

عبادتي سر وجودي وثقتي
في نفسي من ثقتي في دين
ربي

أنا

حلقات جديدة بنقدمها
لكل اب
 وكل ام
وكل مربي
وكل فرد في المجتمع

بنتعلم فيها ازاي نزود ثقة ولادنا في نفسيهم

الحلقات دي مش لولادنا بس لأدي لينا إحنا كمان .

الثقة والطفولة عقدة ورباط
مش بيتحلوا عن بعض ولو إتحلوا.
الخلل والإضطرابات هتظهر وتبان وتزيد بالتأكيد كمان .

هبدأ بمثال هيفسر مضمون الحلقة  كوووولها بس للي يفهمها.


قال رسول الله صلى الله عليه وسلم:
" أنا سيد ولَد آدم يوم القيامة
وأول مَن يَنشق عنه القبر
 وأول شافع
 واول مشفَّع "
***********************
وقال " أنا زعيم بيت في ربض الجنة لمن ترك المراء  وإن كان محقا " " يعني ترك الجدال "
*************************
وقال:أنا أول من يفتح له باب الجنة.
*************************
وقال  " ألا وأنا حبيب الله ولا فخر
وأنا حامل لواء الحمد يوم القيامة ولا فخر
 وأنا أول شافع وأول مشفع يوم القيامة ولا فخر
  وأنا أكرم الأولين والآخرين ولا فخر "
*************************
وقال  " أنا النبي لا كذب أنا ابن عبد المطلب"
---------------------------------------------
برغم اعتزازه وثقته بنفسه لكن مكنش مغرور
  والسر في كده لانه كان بيفكر في الاخرين  ومشاعرهم ودة سبب تفضيله علي باقي الانبياء والرسل.

 وكان من دعائه وهو بيبكي
اللَّهُمَّ أُمَّتِي أُمَّتِي .

ُ فأستجاب الله دعائه
فَقَالَ : يَا جِبْرِيلُ اذْهَبْ إِلَى مُحَمَّدٍ فَقُلْ : إِنَّا سَنُرْضِيكَ فِي أُمَّتِكَ وَلَا نَسُوءُكَ "

الحمد لله
اللهم أرزقنا شفاعته آمين

النتائج

 دة عنوان حلقتنا النهاردة
 واللي هنتكلم فيها إن شاء الله عن

الذكاء الذاتي أو الشخصي

 النوع دة من الذكاء الدكتور هاورد بنفسه بيقول إنه صعب التعرف عليه.
وأنا من هنا بقول إن النوع دة من الذكاءات بيعتبر نتيجة لمحصلة التربية اللي سبقت قبل كدة.

 هسأ سؤال ونجاوب عليه بصراحة
ياتري إنت سلمت رسالتك وأديتك أمانتك قدام ربنا صح.
دايمًا الأمهات بتشتكي وتقول
إبني وسط أصحابه شخصيته معدومة
ولما بيرجع البيت بيفرغ في إخواته.

مش بيعرف ياخد قرار لوحده ولا حتي ليه هدف.
 بيسمع كلام صحابه أكتر حتي مننا .

أناني مش بيحب غير نفسه .

هو أصلا مش عارف هو عايز إيه .

طويل ومراهق في عقل طفل 6 سنين وقدراته محدودة جدًا.

مستفز بيبقي عارف الحل ومش بيجاوب أو يجاوب غلط بيعاندني .
مش بيحب يروح الجامع خالص.
بيخاف من الناس ومواجهتهم مع إنه طبيعي.

طيب ممكن حضرتك تسمعيني شوية
مجرد شكوتك منه بالطريقة واضح منها جدًا طريقتك في التعامل معاه وطريقة نقدك اللي بتهد أبدًا مش بتبني.

شوفي معايا سمات الطفل اللي إتربي صح
ذكاءه الشخصي أو الذاتي إيه ؟
وصلحي بقي إنتِ بعدي وياريت تراجعي نفسك إنت وباباه شوية.

سمات الذكاء الذاتي أو الشخصي

  - هو عارف هدفه ومركز عليه .

 - فاهم نفسه كويس أكتر من أي حد تاني.

  - كمان يقدر يفهم اللي حواليه من غير ما يتكلموا .

  - بيشوف تجارب اللي حواليه ويحل مشاكله ومشاكلهم من خلالها .

  - من وسط كل الذكاءات هو النوع الوحيد القادر يفهم ويحدد قدراته ويستغلها.

  - عنده إحترام عالي لذاته وثقته في النفس عالية جدًا .

  - مهما إتغيرت الظروف هو مازال محتفظ بإحترامه لذاته.

  - متواضع بيعتبر نفسه صوت الضمير لكنه خجول .

  - متعمق في التفكير وبيدرس وجهات النظر.

  - بس الشخصية دي بتأثر في تكوينها النواحي الإجتماعية والإقتصادية نوعا ما.

- وكمان بتختلف باختلاف جنس الطفل .
 أخطر حاجة بتأثر في شخصيته المدرسة والمعلمين .
- بس وجود النموذج الذاتي والعاطفي في البيت بتثبته بإذن الله.

طيب ازاي أساعد إبني وأخليه يثق في نفسه ؟؟؟؟

غيروا نفسكم الأول وبعدها غيروه
" إن الله لا يغير مابقومٍ حتي يغيروا ما بأنفسهم "


والسر بقي بإختصار شديد  مينفعش فيه جهة واحدة

 لأ دة لازم يكون علي 3 مستويات
1. علي مستوي المجتمع

تنمية وتطوير هيئات ومؤسسات الدولة المسئولة عن الأطفال.

عمل وزارة خاصة بالطفولة واللي شُغلتها مراقبة الهيئات دية وسن قوانين و مخالفات للمخالفين .

عمل حملات لتنمية وعي أفراد المجتمع بدورهم في تنشئة الطفل وخصوصًا أئمة المساجد اللي بيتعاملوا مع الأطفال معاملة قاسية ونسوا أو تناسوا تأخر الرسول في إنه يقوم من سجوده بسبب طفل.

2.علي مستوي الاسرة

 لا تحتاج قلوبهم قوانين فالرحمة مفتاحها

السماح بتساؤلات الأطفال وعدم السخرية منها.

كفاية إنتقادات هدامة وإشتغل علي البناء.

خد بالك من مهاراته وقدراته وإدعمها ونميها .

زودوا جرعات الحب الأسري معاه وقدامه كمان.

خليه يشعر بسعادة الأخرين وآلامهم ويشاركهم فيها أو يخففها عنهم.

3 .علي مستوي الفرد

دي مش للأطفال لأ دي لينا إحنا بقي
وإفتكروا إنكم نموذج وولادكم بيمشوا عليه

1 . بطَّل تشكك في نفسك ما دمت صح.

2 . سيبك من التفكير السلبى وإبدأ بنفسك الدنيا حواليك هتتصلح إن شاء الله .

3 .  كفاية خوف من الفشل أول النجاح فشل.

4.  إتكلم عن ذاتك وإنجازاتك ومواطن قوتك بشكل إيجابي قدام طفلك.

5. تقدم للأمام وخليك فخور بنفسك وبقدراتك .

6.  ارضي ربنا الأول وإفتكر إن إرضاء الناس غاية لاتدرك. 

دة طريق إنت رسمته لطفلك بعديك هو هيمشي عليه .

تمام 
انتهت الحلقة النهاردة بس أنا فاضلها 2 حلقتين وتنتهي

 مستنية رد فعلكم ورد فعل ولادكم واعتبروها إستراتيجية ويالا نطبقها سوا 

 ولا تنسونا ووالدينا ومن علمنا من صالح دعائكم.

مع تحيات آيات أحمد منصور 

والسلام عليكم ورحمة الله وبركاته.

 

أنا

الحلقة الثالثة عشر 
.

أنا 

لازم أخد حب وحنان 

أنا 

محتاح قدوة تحسسني بالأمان

أنا 

خايف دايمًا وقلقان 

أنا 

لو علقتني بربي هتلاقيني أقوي وأشجع
إنسان. 

أنا 
سامحني لإني في النهاية 
إنسان 

أنا 

حلقات جديدة بنقدمها
  لكل أب 
 وكل أم 
 وكل مربي
  وكل فرد في المجتمع 

بنتعلم فيها إزاي نزود ثقة ولادنا في نفسيهم .

الحلقات دي مش لأولادنا بس 
 لأ دي لينا أحنا كمان.

الدنيا فيها حاجات حلوة كتير ودة أكيد

وبعد  المحن بتيجي المنح الربانية
وإسعي وأوعي تستناها لإنها مش هتيجيلك وإنت قاعد مكانك. 

هنبدأ بمثال أجمل ما في الحلقة كووووولها
بس للي يفهمه 

لما ربنا أمر سيدنا إبراهيم إنه ياخد السيدة هاجر هي ورضيعها للبلد الحرام .

سابها هناك هي وطفلها سيدنا إسماعيل عليه السلام طاعة لأوامر الله ودة لأنه نبي وبينزل عليه الوحي. 

هنا نادته السيدة هاجر 
لكنه مجاوبهاش لإنه كان خايف علي نفسه من إنه يضعف أدامهم. 

وبكدة بقي إتأكدت السيدة هاجر إن الأمر إلاهي من عند ربنا 
فقالت له
" ءاااااالله امرك بهذا " 

فأشار إليها بنعم

فقالت" إذًا لن يضيعنا" 
الله أكبر
  الله علي اليقين وعدم الشك والقلق حتي في أشد اللحظات محنة . 

 لكنه دعا لهم الدعاء الشهير الطويل في أواخر سورة ابراهيم .

وإستجاب ربنا لدعائه وسعيّ هاجر

 بإنه رزقهم بماء زمزم وهجرة الناس للبلد الحرام .

 والنتيجة طفل عنده يقين مش مضطرب ولا قلقان

ولما نزل الامر الألهي بذبح إسماعيل

 الطفل دة مقلقش ومخافش ولا حتي إضطرب لأ  دة قال لأبوه
" يا أبت إفعل ما تؤمر ستجدني إن شاء الله من الصابرين " 

ياسلااااااام 

تربية نبوية بقي

بس ربنا أمرنا باتباعهم والسير علي خطاهم.

القلق والإضطرابات النفسية عند الاطفال 

 دة عنوان حلقتنا النهاردة واللي هنتكلم فيها إن شاء الله عن 

مشكلة القلق عند الاطفال أعراضها وأسبابها وعلاجها كمان

بس قبل ما أعرض عليكم الأعراض  والأسباب والعلاج .
هنستعرض مع بعض شوية مشاكل بتحصل من الواقع وبتوصلني علي الخاص .

في البيت رغاي وبيتنطط وييجي قدام الناس أخرس ولا بيتحرك. 

 بيخاف من الناس أوي. 

 مزاجه بيتغير كتير مش عارفة أظبطه. 

 علي طول مكتئب وزادت العملية من ساعة ما إبتدت مرحلة المراهقة. 

 نومه مقطع. 
مش بيركز ولا عنده هدف. 
مش بيحب يروح المدرسة. 

من ساعة الحادثة الأخيرة وهو مش بينام من كتر الكوابيس. 

بيخاف ينام لوحده .

بيقرف من صوابع إيديه طول النهار نازل فيها غسيل.

طول ماهو قدام التليفزيون بياكل في ضوافره ويقطع في شعره.

معندوش ثقة في نفسه .... .خالص. 

بس الموضوع زاد عن حده 

قلت مرحلة هتاخد يومين وتعدي بس أهو فات شهر والحاجات دية بتزيد مش بتقل 
اعمل إيه؟؟؟
اتصرف معاه إزاي ؟؟؟ 
حد يساعدني. 

اللي إنتِ بتقولي عليه دة من أعراض القلق والإضطراب عند طفلك
واللي هقولك عليها حالا  إن شاء الله 

في البداية عايزين نعرف إيه هو القلق؟؟؟ 

القلق هو في الحقيقة مجرد شكل من أشكال التوتر

وأعراضه عند الاطفال 

1 السكوت الاختياري. 
2 الإكتئاب والبكاء المستمر.
3قضم الأظافر 
4نتف الشعر 
5 عض الشفايف 
6الخوف الزايد واللي بيقلب بكوابيس.
7الوساوس. 
8قلة النوم والصداع وآلام البطن .
**************************
طيب وأسبابها إيه ؟؟

1 .التليفزيون ومشاهدة الأفلام المرعبة أو اللي بتنظر للعالم نظرة سلبية. 

2 .ظروف ومشاكل الحياة داخل الأسرة واللي بيتأثر بيها الأطفال أكيد. 

3 .سلوكيات مكتسبة من أحد أفراد الاسرة أو المحيطين. 

4 .عوامل وراثية بتدخل في تكوين كيمياء الدماغ .

5 .سوء معاملة الطفل واللي منها العنف الاسري. 

6 .أحداث ما بعد الصدمة أو وفاة شخص عزيز وفراقه أو حتي الخوف من فراقه وللأسف أحيانًا التعامل مع الحالة دية بيتم بشكل قاس من غير بدائل عاطفية. 

7. إقناعه بإن العالم اللي هيخرج ليه مليان بالأخطار وذوي النفوس السيئة وعليه إنه يحترس منهم. 

8 . الكوارث والحوادث 

لكن بالرغم من كدة هو مش فوضوي في حياته. 

وغالبا الاطفال اللي من النوع دة مش بيظهروا خوفهم وقلقهم للعالم الخارجي. 

لانهم بيخافوا إن حد يتهمهم بالجبن أو الضعف
  فأول علاج
انك تتكلم معاه 
وتخليه يقدر يعبر عن القلق اللي جواه. 

علاج القلق بقي بإختصار

1 .غيَّر أفكارك وأفكاره السلبية بأفكار تانية إيجابية .
زي الناس كلها بتحبك وأنا كمان. 
2 .علمه يفصل بين الأفكار الواقعية والخيال. 
3 .خده وإنزل بيه أرض الواقع خليه، يشوف العالم بنفسه ويعرف إن فيه الحلو وفيه الوحش فيه السعيد وفيه الحزين فيه الغني وفيه الفقير .
4 .ساعده يتعامل مع مشاكله ويحلها بنفسه مش يهرب منها. 
5 . وممكن نحتاج للعلاج السلوكي بإننا نعرضه علي مخاوفه بالتدريج أو من خلال نماذج مصغرة وتحت إشرف معالج سلوكي . 
6 .الإسترخاء وتمارين التنفس والتصور الإيجابي. 
7 .إوعي تتكسف إنك تتكلم مع طبيب أو مختص عن أعراض إبنك .
8 .حاول تفهم معاناته وأسبابها وتشفق عليه .
9 .واجه مشاكلك بشكل ايجابي وحلها واحكيله علي مواجهتك الضغوطات اللي قابلتك .
10 .سيبك من القلق وخد بالأسباب وسيبها علي ربنا وهو كمان مش هيسيبك وإبنك معاك هيبقي أسعد انسان في الكون إن شاء الله. 
11 .ممكن نحتاج لعلاج غذائي أو دوائي تحت إشراف الطبيب المختص طبعا 

تمام 

إنتهت حلقتنا النهاردة  بس 

أنا 

فاضلها 1 حلقة واحدة وتنتهي

مستنية رد فعلكم ورد فعل ولادكم واعتبروها إستراتيجية ويالا نطبقها سوا 

ولا تنسونا ووالدينا ومن علمنا من صالح دعائكم. 

مع تحيات آيات أحمد منصور

 والسلام عليكم ورحمة الله وبركاته

أنا

 الحلقة الرابعة

 

 أنا   

ساكت ومش عارف سكوتي دة ليه

أنا   

ساكت لكن شايل دماغ جراح  وعلمه بيبدع فيه

أنا    

شايف ومش شايف أخصائي معاه دكتور

أنا   

شايف دموع أمي بتنزل ليه

أنا   

ساكت ومش عايز أكون وحدي بحس بإيه؟؟

أنا   

عايز اكون إنسان لكن لاقي عيون ضلمة بتسخر ليه

أنا   

توحد ولا إسبرجر لكن بسمة فيها شفائي  بتبخل ليه؟؟

أنا   

لازم ألاقي نفسي ومش لازم اكون مغرور .

أنا   

حقي اكون راضي عن نفسي

أنا   

عبادتي سر وجودي وسر توحدي دة مش ذنبي دة علم سره

في غيب ربي

أنا   

حلقات جديدة بنقدمها

لكل أب وكل أم وكل مربي

وكل فرد في المجتمع

بنتعلم فيها إزاي نزود ثقة ولادنا في نفسيهم الحلقات دي مش لولادنا بس

لأ دي لينا إحنا كمان.

التوحد والإسبرجر إضطرابات إحتار العلماء في أسبابها لكن الأكيد إن الطفل مش سبب أو طرف فيها.

وحقه علينا إنه يلاقي بسمة وإيد رحيمة تطبطب عليه وتساعده..

هنبدأ بنماذج هتوضح هدفي من الحلقة كووولها بس للي يفهمها. .

قال تعالي. " يا أيها الذين ءامنوا لا يسخر قوم من قوم عسي أن يكونوا خيرًا منهم "

والرسول صلي الله عليه وسلم وهو أكرم الخلق عاتبه ربنا في كتابه ليوم الدين ياتري ليه ؟؟؟

دة الرسول و أفضل الخلق وهو خليل الرحمن كمان.

أه صحيح بس بردة ربنا عاتبه.

عارفين عاتبه في إيه ؟؟؟؟

عاتبه في أعمي مش بيشوف أصلا .

لما أعرض عنه الرسول صلي الله عليه وسلم مع إنه مشافهوش لكنه عاتبه فيه ربه .

طيب أومال لو بيشوف وبيحس لكن مش قادر يتكلم زي التوحد مثلًا كان يبقي إيه ؟؟

لاااا دية قصة تانية خالص لا تصدر من رسول كريم رحيم ربنا فضله علي العالمين.

خامس الخلفاء الراشدين عمر بن عبد العزيز     

بعد الإزدهار اللي عمله عمر بن عبد العزيز في البلاد منسيش حقوق ذوي الإحتياجات الخاصة.

وأمر لكل ضرير بمرافق يرافقه في الطرقات

وأمر لكل فرد من ذوي الفئات الخاصة بخادم يخدمه .

كمان الخادم والمرافق دول بيقبضوا رواتبهم من بيت مال الخلافة.

ومشي علي نفس النهج من بعده الوليد بن عبد الملك فأنشأ [عام 707م - 88هـ] مؤسسة متخصصة في رعايتة ذوي الإحتياجات الخاصة .

وظّف فيها الأطباء والخدام وأعطي ليهم الرواتب، ومنح لذوي الاحتياجات الخاصة راتب دوري خاص بيهم

وقال لهم : "لا تسألوا الناس"

وبكدة أغناهم عن سؤال الناس، وعيِّن موظف لخدمة كل مقعد أو كسيح أو ضرير " .

ياااااه كل دة

طيب واللي بيسخر من ذوي الفئات الخاصة أو يضربهم أو يمتنع عن رعايتهم حتي ولو بفلوسهم وبيعتبرهم حاجة ملهاش حق إنها تعيش دة عند ربنا يبقي عقوبته إيه.

دي بقي هسيبها ليكم إنتم تحددوها بنفسكم.

توحد ولا إسبرجر

دة عنوان حلقتنا النهاردة واللي هنتكلم فيها إن شاء الله عن إضطرابات موجودة بالفعل وبدأت تنتشر هي إضطراب التوحد والاسبرجر والفرق وأوجه التشابه ما بينهم كمان.

أما عن التوحد فإختلف علماء العالم تعريفه

منهم اللي عرفه بإنه فصام ومنهم اللي قال عليه إنه إضطراب عقلي أو قصور وتأخر في النمو من كافة النواحي السلوكية والحركية والحسية .

لكن المتفق عليه في إضطرابات التوحد واللي ظاهرة مش بتتغير أبدًا هي.

1. النمطية في بعض السلوكيات والتكرار الملفت لبعض الأمور زي الرفرفة وترتيب الأشياء فوق بعضها أو تنسيقها بشكل مثير وملفت بنفس الطريقة والنمط كل مرة.

2 . الانغلاق علي الذات والعيش في عالم الخيال والتفكير.

3 . تأخر ملحوظ في النمو اللغوي

4  .فقر ظاهر في مهارات التواصل الإجتماعي .

5 . خلل في الأداء الوظيفي والحسي مما يؤدي لعدم التحكم في بعض الوظائف كالريالة أو عدم الشعور بالألم.

6 .فقر التواصل السمعي أو البصري وهنا بنسميه فقر لأن الحاستين عنده موجودين وشغالين فعلًا لكن الطفل التوحدي مش عارف إزاي يستخدمهم ودة بيخليه بيصرخ وبينفعل كتير لأنه مش قادر يوصل طلباته.

7 . بالرغم من وحدته وإنعزاله لكنه بيعاني بالفعل من الوحدة لكن مفيش حد حاسس بيه.

هو محتاج إيد تتمد تطمنه وتسحبه من عزلته للعالم الخارجي علشان يقدر يشوف النور ويخرَّج للعالم النور اللي إتخلق في خياله جواه.

أما الطفل الإسبرجر

أحيانًا بيختلف الأطباء والأخصائين في تشخيص الإسبرجر.

وبيخلطوا بينه وبين إضطراب التوحد ودة لإن فيه بعض السمات المشتركة بينهم

لكن مش بتكون بنفس حدة إضطرابات أطفال التوحد

وكمان علاج الإضطرابات الموجودة عند الإسبرجر بتكون أسرع منها في طفل التوحد والمفروض أسهل بسسسس

بسسس إيه دة إنتي دخلتينا في عالم تاني.

ههههههه معلش بس دة واقع ودي أشخاص موجودة بالفعل وسطينا وليهم حق علينا في الإحترام .

1 .  طفل الإسبرجر ليه مقاييس مبتكرة ومعدلة لتسهيل تشخيصه وعدم الخلط بينه وبين إضطراب التوحد واللي صدر منها الصورة الخامسة.

2 . طفل الإسبرجر أقرب للطبيعي من حيث اللغة ونسبة الذكاء كمان معندوش مشاكل عقلية

لكن شوية تأخر في اللغة أو النمو الحركي زي إنه يقعد أو يمشي متأخر شوية لكن مش كتير.

3 . أخرق بتصدر منه بعض الجمل والالفاظ المبالغ ممكن ما تكون ليها علاقة بموضوع الحوار أو بعض الحركات المضحكة بدون قصد منه.

4 .طفل الإسبرجر عنده شوية صفات بتتشابه مع طفل التوحد واللي منها

-النمطية في سلوكيات معينة

- الوسوسة

- الخوف المفرط

- عدم القدرة علي التفاعل الإجتماعي وعمل صداقات.

- ضعف التواصل البصري والسمعي

- التقليد

كل دية صفات متشابه بينه وبين طفل

التوحد ممكن تكون موجودة كلها أو بعضها لكنه بيختلف عن التوحد في شوية حاجات زي

القدرة علي التخيل والتفكير واللي شبه مش موجودة عنده.

المشاعر والقدرة علي الإحساس بمشاعر وآلام المحيطين بيه ودة لإن الإسبرجر عادةً بيبقي مش مصاحب لإعاقة عقلية علشان كدة بيبقي فاهم كل اللي حواليه لإنه مش عايش في خياله زي التوحد لأ دة إنصبابه كله علي نظرات الآخرين ليه واللي بتبقي مليانة سخرية أو نفور ليه أو انتقاص منه ودة بيخلي ردود فعله عالية جدًا ضد أي كلمة نقد ممكن تتوجه ليه حتي لو كانت بسيطة .

هو بس عايز يحمي نفسه من نظرات الناس وهمساتهم ولمزاتهم وبينعزل عنهم .

 

2 . طفل التوحد منعزل لكن محتاج يكسر وحدته محتاج يخرج للعالم بتاعنا ويعيش فيه ويبدع ويخلي كل تخيلاته واقع بس عايز مجتمع رحيم وناس تساعده يعيش فيه .

الإسبرجر بيعاني بشدة ودة لإنه فاهم محنته.

هو خايف يواجه الناس لإنها ممكن تأذيه  - التوحد بينعزل لكن الإسبرجر بيكره وبيصيبه جمود في مشاعره.

* الحل إيه والعلاج إيه

كلها مشاكل ثقة في النفس وإحترام ذات بتمس الأنا الخاصة بالنوعية دية من الأطفال

والعلاج فيكم إنتم الناس المحيطين بيه والمجتمع كمان

التوحد بيتعالج علاج وظيفي

- حسي

- لغوي

- بيئي

- تواصل بصري وإجتماعي

بسسس علشان يدخل العالم اللي إحنا فيه ويخرج من خياله .

الإسبرجر بيتعالج

- علاج وظيفي

- حسي

- لغوي

- تواصل بصري وإجتماعي

لكن علشان يحب العالم اللي إحنا بنعيش فيه

والحل لازم نغير العالم اللي إحنا فيه علشان يقدر يحتوي الناس اللي بتعيش فيه

التوحد فيه منه ذوي إعاقات عقلية دة صحيح لكن الحالات اللي بتنجو منه هو والإسبرجر  عباقرة لو إستغلناهم صح هيعملوا المعجزات.

بسس اللي يسمع وينفذ

تمام إنتهت الحلقة النهاردة لكن

أنا

 فاضلها حلقة وتنتهي

مستنية رد فعلكم ورد فعل ولادكم

ولا تنسونا ووالدينا من صالح دعائكم

مع تحيات آيات أحمد منصور

والسلام عليكم ورحمة الله وبركاته

أنا
الحلقة الاخيرة

أنا 
مش محتاج شفقة ولا إحسان

أنا 
بس عايز حقي في الشعور بالامان 

أنا 
نفسي أعيش في مدينة الاحلام 
أعرف حدودي وأطبق الاسلام 

أنا 
نفسي أكون أعظم انسان
أموت وبعدي ذكري عايشة في قلب كل إنسان 

أنا 
عيدي جاي أكيد أنا استنيت 
 مش هتظلم طول ما أنا صليت 
يالا يافرحة عيدي بلاش كدة تأخير 
إملي البيوت إملي القلوب إملي الشوارع

 وإرسمي للطفل أحلي طريق 

ما أنا طبقت كل اللي أنا إتعلمت. 
وعرفت سر وجودي من ثقتي في دين معبودي. 

يالا ياعم صيام إملا الفرح ألوان
وتعالي ليلة العيد خبط علي كل بيبان 

متخفش مستنيك مش نايم إلا بيك 

 ما إنت في ليلة العيد سيبت الفرح أشكال 
أهلا بليلة العيد. 

أنا 
حلقات جديدة بنقدمها
لكل أب وكل أم  وكل مربي
 وكل فرد في المجتمع 

 بنتعلم فيها إزاي نزود ثقة ولادنا في نفسيهم. 

  الحلقات دي مش لولادنا بس

  لأ دي لينا إحنا كمان 

 الحلم تحقيقه مش بعيد 

بس الإرادة تحدي 

واللي عايز حاجة مينفعش يسيبها تعدي 
والمثال اللي جاي واقع مش خيال 

حقايق من سيرة الرسول

الرسول ليه مواقف كتير مع الأطفال. 

 منها اللي بالحب 
 منها اللي بالإحترام 
 منها اللي بالرحمة والتعليم مع الحزم كمان 

الرسول رسم لهم طريق وهما كملوا عليه بعده التربية بالحب 

فرح الرسول بإبنه إبراهيم وضمه وقبِّله ولما مات إبنه بكي لفراقه 
وقال " إن العين تدمع والقلب يحزن ولا نقول إلا ما يرضى ربنا وإنا بفراقك يا إبراهيم لمحزونون"

صلي وسجد وطول في سجوده لدرجة قلقت الصحابة عليه. 
 كان السبب إن الحسن كان راكب علي ظهر الرسول ومحبش يستعجله في لعبه. 

طفل بقي.. حقه يلعب. 
الله يهدينا جميعا

ولما مرة إتأخر عليه الحسن راح لحد عنده وقبله ودعي له " اللهم أحبه وأحب من يحبه» 

كان كل مولود يتولد أول ما يشوفه يضمه ويدعيله بالبركة .

التربية بالإحترام. 

لما كان الرسول بيشرب وعلي يمينه طفل صغير وعلي شماله شيوخ كبار 
استأذنه الرسول في إنه يشرب الكبار الأول 

 لكن الطفل رفض لانه حقه 
محدش شتمه ولا إعتبره نقصان في التربية لإن دية تربية بالحقوق.

البنات وأحاديثها الكتير في أجر تربيتها. 

التربية بالرحمة

كان الرسول بيلعب ويجري ورا الحسن ويضحك معاه
وكان بياخد الحسن وأسامة بن زيد علي رجله ويقول " اللهم إرحمهما فاني أرحمهما" 

وكان في صلاة الجماعة لو سمع طفل بيصرخ يخفف في الصلاة.. شفقة علي الأم مكنش بيقولها صلي في بيتك أحسن .
التربية بالتعليم 

 كان بيعلمهم الصدق حتي في الهزار .

 وكمان بيعلمهم " ياغلام سم الله وكل بيمينك وكل مما يليك 
كان دايمًا بيكلمهم زي الكبار بالضبط
" إحفظ الله يحفظك إحفظ الله تجده تجاهك ".

أسامة بن زيد 

إهتم الرسول بتربيته وتعليمه وولاه قيادة الجيش في عمر 18 سنة ووقف جمبه لما إعترض بعض الصحابة. 

تربية ولا في الأحلام بس دي حقيقة حصلت بالفعل مش خيال 

مواقف الرسول كتير مع الأطفال

التصور الإيجابي للتربية 

التربية الخاصة حقيقة مش خيال 

 دة عنوان حلقتنا النهاردة 

واللي هنتكلم فيها المرة دية إن شاء الله عن حلول وبس  مش مشاكل زي كل مرة 

اللي فات كان حقيقة بس اللي جاي في منه حقيقة والباقي خيال. 

دورنا بقي إحنا نحققه. 

 بتدور أحداث القصة حوالين طفل إسمه " واثق "

واثق طفل مؤدب جدًا ولطيف كمان 

بيعيش واثق مع باباه ومامته وإخواته  في بيت خيالي

باباه إسمه " مثالي " 
ومامته إسمها حنان
  وإخواته البنات

  الأولي إسمها " تناصح " 
 والتانية إسمها " فذة " .

واثق عايش في مدينة الأحلام في حي الإيجابية في بيت خيالي جميل إسمه بيت الخيال. 
أما واثق فهو دايمًا واثق في نفسه 
 مجتهد في دراسته 
 متدين برغم سنه الصغير
 بيحب الصلاة مش بيصلي بالزق 
بيعرف يتكلم كويس ويعبر عن مشاعره مش بسهولة تهزه آراء اللي حواليه في نفسه .
 نسبة ذكاءه متقدمة مش عبقري ولا حاجة. 
 لكن طريقة تربيته أثرت فيه صح وخلته طفل يقدر يتحمل مسئولية بلد مش نفسه وبس.

طيب إيه هي طريقة تربيته ؟؟؟ 

طريقة تربيته هيحكلكوا عليها واثق بنفسه 

أنا إسمي واثق سر ثقتي في نفسي

حاجات كتير أولها بابايا 

بابايا إسمه " مثالي" 
عنده صفات مثالية وجميلة كتير

أول ما بيخرج من الشغل بينسي كل اللي حصل فيه 

ولو شوية مشاكل زيادة شوية بيكتمها في نفسه .
ولما يقعد مع ماما لوحده بيشاركها مشاكله ويدوروا علي حلول سوا " أكيد ماهم شركا " 

أول مابيدخل من البيت بيحط في جيبه هدايا للشطار ولو كنا آخر الشهر 

شوية بونبوني بيعالجوا الموقف معاه ومعانا إحنا كمان. 

بدخوله البيت بحس أنا بالأمان. 
لما أغلط بيبص ويقولي أنا عارف إنك مؤدب ومش قاصد تزعلني منك. 

بابا عارف عني كووول حاجة حتي الألعاب والكرتونات المفضلة ودة لإنه بيقعد معايا ربع ساعة كل يوم يبص عليا ويشجعني وبصراحة بحب أكسب في اللعبة قدامه وأشوف نظرات إعجابه بيا. 

هو مش موجود علي طول لكنه عارف كل حاجة بتحصل. 

حتي أختي" تناصح" لما كانت عندها شوية إضطرابات

كان دايما بيتابعها مع ماما
وكان ساعات مش بينام من القلق لإنه خايف يكون قصر في حقها .

وكان دايمًا بيقول لماما متقلقيش إن شاء الله هتبقي زي الفل. 
بصراحة أختي تناصح إتغيرت كتير

لإن ماما وبابا إرادتهم من حديد.
خدوا بالهم من تصرفاتها الإيجابية ودعموها. 
والسلبية أشفقوا عليها وصلحوها. 
ولما بتجيلي حالات تمرد غصب عني مش بقصدي بصة بابا بتخليني أراجع نفسي لإني بحبه وأخاف يزعل مني. 
حضنه ولعبه معايا أكتر حاجة بحبها بصراحة .

بابا صعب إني أوصفه في كلمات لإني هظلمه أكيد. 
  هو نموذج ويارب أكون زييه وأمشي عليه.

أما ماما إسمها حنان 

هي إسم علي مسمي بصراحة حنيتها مالية علينا البيت حب وأمل. 

في كل مشكلة تقابلني دايمًا بحكيلها ومش بخاف منها 
لإنها بتفكر وتشاركني فيها وتحلها معايا.

بصعب عليها دايما 
من المدرسة للواجب للمذاكرة مفيش وقت للترفيه .

بتساعدني في المذاكرة علشان ما أروحش دروس إضافية وأتحرم من اللعب.

دايما بتساوي بيني وبين إخواتي علشان منتخنقوش سوا  

 وتحط إيدي في إيدهم وتقولي إنت أخوهم الكبير ولازم تحافظ عليهم 

بتحاول متشتكيش لكن باين عليها الإرهاق. 

بتتعلم وبتعلم كل الناس كمان 
ماما قريبة جدًا من ربنا 

بتحب كل الناس والناس كلها بتحبها .
بتتحاور وبتتكلم معايا كتير في مشاكل وحلول لدرجة إني صدقت إني كبير. 

كانت دايمًا بتراقبني من بعيد علشان أقدر أحل مشاكلي لوحدي وأتحدي الصعوبات لوحدي بعد كده. 

بتحاول تقابل العصبية بهدوء علشان تحافظ علي جو البيت هدوء

وبابا بيحبها وبيحترمها جدًا 
ودة بيبان عليهم قدامنا أوي وبيدينا شعور رائع بالأمان. 

 حتي أختي فذة ذكاءها المكاني فذ وعالي

ماما بسميها أم العباقرة 
ربنا يخليهم ليا آمين

أما جدو وتاتا بقي حاجة كدة زي الشيكولاتة

بس ساعات بخاف منهم هما وخالو بصراحة من تعليقاتهم السلبية 
لكن ماما وبابا حرس حدود وقفين جمبنا بيدعمونا ويدافعوا عننا . 

وفي المدرسة أستاذ" فهِّيم" بيحببني في الدراسة
ويسمع أسئلتي ويجاوب عليها بكل صراحة ولو مش فاهم بردة يشرح تاني ومبيزهقش  .

ودايما يتكلم مع أستاذ غضبان علشان يغير أسلوبه مع باقي الأطفال. 

ويفكروا برسالته اللي هيتحاسب عليها قدام ربنا. 

معايا في الفصل راضي وعادي واحد داون والتاني مش عادي. 

 الوزارة عدلت المناهج علشانهم وطوروها وجددوا الفصول وظبطوها .

علشان نعرف نتفاهم ونتعامل معاهم بشكل إيجابي .

أنا بحبهم جدًا وإستفدت من وجودهم معانا والتعليم بقي سهل وبيدرس بطريقة جميلة .

الحمد لله

 أما مدينتي بقي هي مدينة الأحلام
مدينة فعلا ولا في الأحلام. 

 دولة واضحة ووزير للاطفال كمان

بيراقب كل الأماكن اللي بيتواجد فيها الأطفال ويعمل فيها حملات لتوعية الناس والأطفال الصغيرين كمان.

حتي إمام المسجد الشيخ سرحان
إمام مسجد دار السلام.

بياخدني جنبه وهو بيصلي
ولما بطلب من يعلمني الآذان يفتح الميكرفون يقولي إبدأ يا بلال. 

علمتني أمي إني ألتزم بالصف الأول للصلاة خلف الإمام قالتلي هو دة طلب الرسول بالتمام. 

 ولما حد يقولي إرجع ياصغير
يسحبني من إيدي إمام المسجد ويقوله إرجع ورا يا متأخر وخلي الولد قدام. 

أما عم صيام في ليلة العيد بيوزع لعب وهدايا وبلالين كتير.

بستناه وبحبه علشان بيفرحنا دايما بليلة العيد .

الله عليك ياعم صيام مليت الدنيا فرحة ونور وخيال معاك أنا لحد ما تيجي صلاة العيد .

اللي في إيده حاجة يطبقها ويبدأ بنفسه هيلاقي وراه طابور طويل.

كل سنة وانتم طيبين

كل سنة وإنتم والأمة الإسلامية طيبة وفي وأمان ورحمة وسلام وثقة بالله وفي نفسها كمان.

كل عام وإنتم بخير 
 إنتهت حلقات 

أنا 

بس العلم لسة ما إنتهاش 

حققوا حلمكم حتي لو كان خيال

ولا تنسونا ووالدينا ومن علمنا من صالح دعائكم .

مع تحيات آيات أحمد منصور 

والسلام عليكم ورحمة الله وبركاته.